आंतर महाविद्यालयीन पाॅवर लिफ्टिंग स्पर्धेत महात्मा फुले महाविद्यालयाला सुवर्णपदक
आंतर महाविद्यालयीन पाॅवर लिफ्टिंग स्पर्धेत महात्मा फुले महाविद्यालयाला सुवर्णपदक
अहमदपूर (गोविंद काळे) : स्वामी रामानंद तीर्थ मराठवाडा विद्यापीठ, नांदेड आणि महाराष्ट्र उदयगिरी महाविद्यालय, उदगीर यांच्या संयुक्त विद्यमाने उदगीर येथे पार पडलेल्या आंतर महाविद्यालयीन ‘ ब’ विभागीय पॉवरलिफ्टिंग स्पर्धेत येथील महात्मा फुले महाविद्यालयाच्या खेळाडूंनी चमकदार कामगिरी करत ब्राॅंझसह सुवर्ण पदक पटकावून यशाच्या सातत्याची कमान अबाधित ठेवली.
याबाबत अधिक माहिती अशी की, नांदेड येथील स्वामी रामानंद तीर्थ मराठवाडा विद्यापीठाच्या वतीने आंतर महाविद्यालयीन’ ब’ विभागीय पॉवर लिफ्टिंग स्पर्धेचे आयोजन उदगीर येथील महाराष्ट्र उदयगिरी महाविद्यालयात करण्यात आले होते. या स्पर्धेत ६७ किलो वजन गटात महात्मा फुले महाविद्यालयाच्या विश्वजीत अंबादास खांडेकर या विद्यार्थ्याने ३५० किलो वजन उचलून ब्राॅंझपदक प्राप्त केले, तर सौरभ रमेश पवार या विद्यार्थ्याने १०५ किलो वजन गटात ४५० किलो वजन उचलून प्रथम क्रमांकासह सुवर्णपदक पटकावले आहे.
दोन्ही यशस्वी खेळाडूंचे किसान शिक्षण प्रसारक मंडळ, उदगीरचे अध्यक्ष श्रीरंगराव पाटील एकंबेकर, उपाध्यक्ष माधवराव पाटील, सचिव पी. टी. शिंदे यांच्यासह सर्व पदाधिकाऱ्यांनी अभिनंदन केले असून, महाविद्यालयात दोन्ही विद्यार्थ्यांचा सत्कार किसान शिक्षण प्रसारक मंडळाचे सचिव पी.टी. शिंदे व महाविद्यालयाचे प्राचार्य डॉ. वसंत बिरादार पाटील यांच्या हस्ते करण्यात आला. याप्रसंगी यशस्वी खेळाडूंना मार्गदर्शन करणारे प्रशिक्षक, महाविद्यालयाचे क्रीडा संचालक डॉ. अभिजीत मोरे यांचाही यथोचित सन्मान करण्यात आला. यावेळी महाविद्यालयातील सर्व प्राध्यापक व कर्मचारी उपस्थित होते.
About The Author
