एमआयटी विश्वशांती विद्यापीठाचा ‘ समर्पित जीवन गौरव पुरस्कार’ ज्येष्ठ पत्रकार जयप्रकाश दगडे यांना जाहीर
एमआयटी विश्वशांती विद्यापीठाचा ' समर्पित जीवन गौरव पुरस्कार' ज्येष्ठ पत्रकार जयप्रकाश दगडे यांना जाहीर
लातूर (एल.पी.उगीले) : लातूर जिल्ह्यातील पत्रकारितेचे पितामह म्हणून ओळखले जाणारे जेष्ठ पत्रकार जयप्रकाश जी दगडे यांच्या पत्रकारितेच्या कार्याचा गौरव एमआयडीस विश्वशांती विद्यापीठाच्या वतीने करण्यात येतो आहे.
याबाबतीत हाती आलेली माहिती अशी की,पुणे येथील एमआयटी विश्वशांती विद्यापीठाचा ‘ ‘समर्पित जीवन गौरव पुरस्कार ‘ ज्येष्ठ पत्रकार जयप्रकाश दगडे यांना जाहीर झाला असून, या पुरस्काराची घोषणा एमआयटी विश्वशांती विद्यापीठाचे संस्थापक अध्यक्ष प्रा. डाॅ. वि.दा. कराड आणि नालंदा विद्यापीठाचे माजी कुलपती डाॅ. विजय भटकर यांनी पुणे येथे केली .
विद्यापीठाच्या वतीने पुणे येथे येत्या 3 ते 5 ऑक्टोबर या काळात होत असलेल्या 10 व्या जागतिक विज्ञान, धर्म/अध्यात्म आणि तत्वज्ञान संसद / परिषदे दरम्यान 4 ऑक्टोबर रोजी आयोजिण्यात आलेल्या ‘ ‘विश्वशांतीसाठी पत्रकारांची भूमिका’ ह्या विषयावरील चर्चासत्रातही दगडे सहभागी होणार आहेत. अविरत, निरपेक्ष आणि सामाजिक बांधिलकी ठेऊन आयुष्यभर
केलेल्या पत्रकारितेतील योगदानाबद्दल जयप्रकाश दगडे यांचा हा पुरस्कार देऊन परिषदे दरम्यान विशेष सन्मान करण्यात येत असल्याचेही प्रा. डाॅ.कराड आणि डाॅ. विजय भटकर यांनी या संदर्भात प्रसृत केलेल्या पत्रात नमूद केले आहे.
विशेष बाब म्हणजे, या परिषदेच्या उद्घाटन सोहळ्याआधी जगातील सर्व धर्मांचे प्रतिनिधी आपल्या धर्मग्रंथांसह विश्वशांती दिंडीत सहभागी होऊन , आपापल्या धर्मातील विश्वशांती व मानवकल्याणाचा दिव्य संदेश देणार आहेत. या वर्ल्ड पार्लमेंटच्या व्यासपीठावरुन संपूर्ण जगाला शांतता आणि मानवकल्याणाचा संदेश देण्यासाठी जगभरातील विविध धर्मांचे प्रमुख, शास्त्रज्ञ, तत्वज्ञ, विचारवंत उपस्थित राहणार आहेत.
About The Author
