कृषी उत्पन्न बाजार समितीच्या संचालक मंडळाने घेतली दिलीपराव देशमुख यांची सदिच्छा भेट !!

उदगीर (एल.पी.उगीले) : काँग्रेस पक्षाचे ज्येष्ठ नेते तथा माजी राज्यमंत्री दिलीपराव देशमुख आणि माजी पालकमंत्री आ.अमितभैया देशमुख यांच्या नेतृत्वाखाली निवडून आलेल्या उदगीर कृषी उत्पन्न बाजार समितीच्या नूतन संचालक मंडळांने, आपल्या नेत्यांची भेट घेऊन त्यांच्या सुयोग्य नियोजनामुळे विजयश्री खेचून आणता आली. भविष्यातील कामकाजाला देखील त्यांनी सक्रिय मार्गदर्शन करावे, अशी अपेक्षा व्यक्त करून या निवडणुकीत केलेल्या सहकार्याबद्दल ऋण व्यक्त केले. उदगीर कृषी उत्पन्न बाजार समितीच्या निवडणुका अत्यंत अटीतटीच्या झाल्या. या निवडणुकांसाठी काँग्रेस पक्षाचे नेते आ. अमितभैया देशमुख आणि राष्ट्रवादी काँग्रेसचे नेते माजी मंत्री आ. संजय बनसोडे यांच्या मार्गदर्शनामुळे ही बाजार समिती महाविकास आघाडीच्या ताब्यात घेता आली, अशी भावना सभापती शिवाजीराव हुडे व राष्ट्रवादी काँग्रेसचे तालुकाध्यक्ष प्रा. शिवाजीराव मुळे यांनी व्यक्त केली. याप्रसंगी लातूर जिल्हा मध्यवर्ती सहकारी बँकेच्या संचालक लक्ष्मीताई चंद्रशेखर भोसले, काँग्रेसचे उदगीर तालुका अध्यक्ष तथा नूतन संचालक कल्याणराव पाटील, उदगीर पंचायत समितीचे माजी उपसभापती बाळासाहेब मरलापल्ले, बाजार समितीचे नूतन संचालक विधीज्ञ पद्माकर उगिले, मधुकरराव एकुरकेकर, प्रीती चंद्रशेखर भोसले, संतोष बिरादार श्याम डावळे, उदगीर देवणी जळकोट तालुका जिल्हा परिषद शिक्षकांची सहकारी पतसंस्था चेअरमन सर्जेराव भांगे यांच्यासह नूतन संचालक मंडळ सोबत होते.
उदगीर कृषी उत्पन्न बाजार समितीच्या माध्यमातून शेतकरी, कष्टकरी, व्यापारी, हमाल, मापाडी या सर्वांच्या प्रगतीचा विचार करून सकारात्मक दृष्टीने काम करावे, असा सल्ला काँग्रेसच्या नेते मंडळींनी याप्रसंगी नूतन संचालक मंडळाला दिला.