सिंधुताई सपकाळ यांना दयानंद कला महाविद्यालयात श्रद्धांजली अर्पण

लातूर (प्रतिनिधी) : थोर समाजसेविका सिंधुताई सपकाळ यांचे दुःखद निधन झाले. त्यांना दयानंद कला महाविद्यालयात भावपूर्ण श्रद्धांजली अर्पण करण्यात आली. “सिंधुताईंचे कार्य अत्यंत प्रेरक होते. प्रतिकूल परिस्थितीशी सामना कसा करावा याचे कृतीतून मार्गदर्शन सिंधुताईंनी केले. अत्यंत दुःखद प्रसंगी व कठीण काळात संकटांना न घाबरता त्यांनी धीरोदत्तपणे मार्ग काढला व दीनदुबळ्या मुलींची माय होण्याचं कार्य त्यांनी केले.” असे प्रतिपादन प्राचार्य डॉ.शिवाजी गायकवाड यांनी केले. दयानंद कला महाविद्यालयाच्या वार्षीक स्नेहसंमेलनाच्या त्या एकेकाळी प्रमुख पाहुण्या म्हणून आल्या होत्या त्यांच्या आठवणींना त्यांनी उजाळा दिला.

याप्रसंगी उपप्राचार्य अनिलकुमार माळी, पर्यवेक्षक डॉ.दिलीप नागरगोजे, डॉ. शिवाजी जवळगेकर, डॉ प्रदीप सूर्यवंशी, डॉ प्रशांत मान्नीकर, कार्यालयीन अधिक्षक नवनाथ भालेराव आदी उपस्थित होते. कार्यक्रमाचे सूत्रसंचालन डॉ संदीप जगदाळे यांनी केले. श्रद्धांजली कार्यक्रमासाठी महाविद्यालयातील प्राध्यापक, प्रशासकीय कर्मचारी व विद्यार्थी मोठ्या संख्येने उपस्थित होते.