नवनाथ गायकवाड यांचा सत्कार संपन्न

उदगीर (प्रतिनिधी) : सामाजिक, राजकीय व सांस्कृतिक क्षेत्रात सातत्याने धडपड करणारे चर्मकार समाजाचे नेते व राष्ट्रीय चर्मकार महासंघाचे राज्य उपाध्यक्ष नवनाथ गायकवाड यांची राष्ट्रवादी काँग्रेस पार्टी सेवादलाच्या मराठवाडा विभागीय अध्यक्षपदी निवड झाल्याबद्दल राष्ट्रीय चर्मकार महासंघ व चर्मकार समाज उदगीर तालुक्याच्या वतीने त्यांचा सपत्नीक सत्कार करण्यात आला.
यावेळी कार्यक्रमाचे अध्यक्षस्थानी राष्ट्रीय चर्मकार महासंघाचे लातूर ग्रामीण जिल्हाध्यक्ष मधुकर वाघमारे हे होते तर प्रमुख पाहुणे म्हणून राष्ट्रीय चर्मकार महासंघ लातूर ग्रामीण महिला जिल्हाध्यक्षा सौ. उर्मिला वाघमारे, पंडितराव सूर्यवंशी, नरसिंग सदानंदे, सुरेश झिल्ले, मारोती भुजबळे, गंगाधर गिरगावकर, सुनील गायकवाड, माधव कल्याणकर, बालाजी माने, संग्राम अमिलपुरे, बजरंग वाघमारे, प्रा.सौ. पुष्पा गायकवाड, सौ. रुक्मिणी‍ शिंदे, सौ. जयश्री टिळेकर, सौ. वसंती ईदलगावे, सौ. सरस्वती वाघमारे, सौ बबीता वाघमारे आदी मान्यवर उपस्थित होते.
आपल्या समाजातील उमदा तरुण ध्येयवेडा होऊन समाजातील लोकांच्या अडीअडचणी सातत्याने सोडवत असतात. राष्ट्रीय चर्मकार महासंघाच्या माध्यमातून समाजातील गुणवंतांचा सत्कार, राष्ट्रसंत गुरू रविदास महाराज जयंती असेल किंवा अनेक समाजोपयोगी उपक्रम नेहमी राबवून समाजातील मुला- मुलींना शिक्षणाच्या मुख्य प्रवाहात आणण्यासाठी प्रयत्न करतात. कसलाही राजकीय वारसा घरात नसताना स्वकर्तृत्वाने राजकारणात भरारी घेणारा आमच्या समाजाचा नेता म्हणून समाज ताठ मानेनं अभिमानाने सांगतो. अशा बहुआयामी व्यक्तिमत्त्वाचा सत्कार करताना अभिमान वाटतो असे समाजबांधव गौरवोद्गार काढून भावी सामाजिक व राजकीय वाटचालीस शुभेच्छा दिल्या. या कार्यक्रमाचे सूत्रसंचालन प्रा. सुधीर नाबदे तर आभार पांडुरंग वाघमारे यांनी मानले
या सत्कार प्रसंगी राष्ट्रीय चर्मकार महासंघ व चर्मकार समाजातील पदाधिकारी, कार्यकर्ते व समाज बांधव मोठ्या संख्येने उपस्थित होते.