अहमदपूरच्या महात्मा फुले महाविद्यालयात मराठी विषयाच्या आंतरराष्ट्रीय चर्चासत्राचे आयोजन

अहमदपूर (गोविंद काळे) : भारतीय स्वातंत्र्याच्या अमृत महोत्सवी वर्षानिमित्त येथील महात्मा फुले महाविद्यालयाच्या मराठी विभागाच्या वतीने आज २२ सप्टेंबर रोजी सायंकाळी ५ वाजता आभासी पद्धतीने ‘नवोदत्तरी मराठी दलित आत्मकथने स्वरूप आणि चिकित्सा ‘या विषयावर एकदिवसीय आंतरराष्ट्रीय चर्चासत्राचे आयोजन करण्यात आले आहे.

याबाबतची अधिक माहिती अशी की, महात्मा फुले महाविद्यालय हे भारतीय स्वातंत्र्याच्या अमृत महोत्सवी वर्षानिमित्त विविध उपक्रम घेत असून, त्याचाच एक भाग म्हणून स्वामी रामानंद तीर्थ मराठवाडा विद्यापीठ, नांदेड आणि महात्मा फुले महाविद्यालयाच्या मराठी विभागाच्या वतीने एक दिवसीय आंतरराष्ट्रीय चर्चासत्राचे आयोजन करण्यात आले आहे. “नव्वदोत्तरी मराठी आत्मकथने: स्वरूप आणि चिकित्सा ” या विषयावर होत असलेल्या या आंतरराष्ट्रीय चर्चासत्राचे अध्यक्षस्थान महाविद्यालयाचे प्राचार्य तथा महाराष्ट्रातील ख्यातनाम लेखक प्राचार्य डॉ. वसंत बिरादार पाटील हे भूषविणार असून, यावेळी किसान शिक्षण प्रसारक मंडळाचे अध्यक्ष श्रीरंगराव पाटील एकंबेकर व सचिव ज्ञानदेव झोडगे गुरुजी यांची विशेष उपस्थिती लाभणार आहे.

या चर्चासत्राचे उद्घाटन जर्मनी येथील सुप्रसिद्ध यु-ट्युबर तथा माध्यम तज्ज्ञ जयलक्ष्मी आंबटवार या करणार असून मुंबई येथील मुंबई विद्यापीठाच्या मराठी विभाग प्रमुख तथा महाराष्ट्रातील ज्येष्ठ पुरोगामी विचारांच्या लेखिका डॉ. वंदना महाजन यांचे यावेळी बीज भाषण होणार आहे. शोधनिबंध सत्राचे अध्यक्षस्थान महाराष्ट्रातील सुप्रसिद्ध लेखक तथा सिने अभिनेते, दिग्दर्शक डॉ. दिनेश काळे (वसई मुंबई) हे भूषविणार आहेत. या सत्रामध्ये डॉ. दीपांजली लांडगे (कॅनडा), डॉ. नाथराव घरजाळे (अंबाजोगाई), डॉ. सविता पवार (मेहकर), व डॉ. लालबा दुमटकर (अमरावती) हे अभ्यासक आपले शोध निबंध सादर करणार आहेत. या आंतरराष्ट्रीय चर्चासत्रात गुगलमीटवर सायंकाळी ठीक ५ वाजता सर्वांनी सहभागी व्हावे असे आवाहन प्राचार्य डॉ. वसंत बिरादार पाटील यांनी तसेच संयोजक डॉ. मारोती कसाब व डॉ. अनिल मुंढे यांनी केले आहे.