देवणी शहरात जागोजागी बसविले आठ सीसीटीव्ही कॅमेरे

देवणी (रणदिवे लक्ष्मण) : देवणी शहरामध्ये होणाऱ्या घटनावर नजर ठेवण्याकरिता व वाढत्या गुन्हेगारीला आळा बसण्याकरिता शहरातील प्रमुख तीन चौकामध्ये सीसीटीव्ही कॅमेरा बसविण्यात आले आहेत. या कॅमेऱ्याच्या माध्यमातून देवणी पोलीस ठाण्यातून नजर ठेवण्यात येणार आहे. या कॅमेरा मुळे बऱ्याच गोष्टीचा उलगडा करण्याकरिता पोलिसांना मदत होणार आहे.डीपीडीसीच्या माध्यमातून देवणी नगरपंचायतीकडून शहरातील लासोणा चौकात ३, बोरोळ चौकात ३ व जुने मार्केट लाईन मधील हनुमान मंदिराजवळ २ अशा प्रमुख ठिकाणी ८ सीसीटीव्हीकॅमेरे बसविण्यात आले आहेत. दरम्यान शहर हे सिसिटिव्ही कॅमेराच्या नजरेत असल्यामुळे मोटर सायकल चोरी, घरफोडी, बँकेवरील दरोडे, जनावरांच्या चोरी, महिलेच्या छेडछाडी, शाळेतील विद्यार्थ्यांचे छेड काढणाऱ्या व मद्यधुंद अवस्थेमध्ये बेफाम चालणारे वाहन चालकावर सुद्धा पोलिस प्रशासनाचा मोठा वचक बसणार आहे. तसेच शहरामध्ये घडलेल्या अप्रिय घटनांचा उलगडा करण्याकरिता सुद्धा पोलिसांना या सीसीटीव्ही कॅमेराची मदत होणार आहे. येत्या काळात शहरातील घटनेच्या उलगडा करण्याकरिता पोलिसांना मदत व्हावी, याकरिता शहरात आणखी आठ कॅमेरे बसविण्यात येणार आहेत, अशी माहिती उपनगराध्यक्ष अमित मानकरी यांनी दिली.