आंदोलनाच्या ठिकाणी जावून मारहाण,शिवीगाळ व धमकी - गुन्हा दाखल

आंदोलनाच्या ठिकाणी जावून मारहाण,शिवीगाळ व धमकी – गुन्हा दाखल

उदगीर ( प्रतिनिधी ) : उदगीर शहरातील खानका गल्लीमधील शेख लाईक शेख अकबर यांनी बेकायदेशीर व विनापरवाना बांधकाम करून त्या जागेत बेकायदेशीरपणे बेकरी चा कारखाना सुरु केल्या संदर्भात व हे अतिक्रमण तात्काळ काढण्यात यावे म्हणून अब्दुल मुक्तदीर अब्दुल मुनाफ देवणीकर यांनी नगरपालिका प्रशासनासमोर बेमुदत धरणे आंदोलन सुरू केले आहे.सदरील आंदोलन मोडित काढण्यासाठी शेख लाईक शेख अकबर यांनी आंदोलन कर्ते देवणीकर यांना आंदोलनाच्या ठिकाणी जावून मारहाण केली,शिवीगाळ केली आणि धमकी दिली अशी फिर्याद देवणीकर यांनी उदगीर शहर पोलिस स्टेशनला दिली आहे.या फिर्यादीवरून शहर पोलिस स्टेशन येथे लाईक शेख यांच्या विरोधात सी आर पी सी 155 अंतर्गत एन सी क्र 151/21,गुन्हा कलम323,504,506,34 भारतीय दंड विधान संहिता अन्वये दाखल करण्यात आला आहे.

या संदर्भात देवणीकर यानी सदरील अतिक्रमण काढण्याच्या संदर्भात उदगीरच्या उपमुख्यधिकाऱ्यांना विनंती केली असता, त्यांनी देवणीकर यांच्याकडे बक्षिसाची अर्थात लाचेची मागणी केल्याची तक्रारही सदरील निवेदनात देवणीकर यांनी केली आहे. तसेच या जागेवरील बेकायदेशीर बांधकाम तात्काळ काढून टाकण्यात यावे. ज्यामुळे या कारखान्यातून वायू प्रदूषण, ध्वनी प्रदूषण, जल प्रदूषण होत असून परिसरात सर्वत्र दुर्गंधी पसरलेली आहे. यामुळे नागरिकांच्या, वयोवृद्ध नागरिक आणि लहान मुले त्यांच्या आरोग्यावर भीषण दुष्परिणाम होत असल्याचेही सदरील निवेदनात नमूद केले आहे. तसेच या कारखान्याच्या प्रदूषणामुळे आजूबाजूला असलेल्या जुन्या घरांना तडे जात असून ध्वनी प्रदूषणामुळे कानावर व र्‍हदयावर विपरीत परिणाम होत असल्याचे ही नमूद केले आहे. तसेच या कारखान्यातून जे दूषित पाणी बाहेर सोडले जाते ते समोरच्या खड्ड्यात साचत असल्यामुळे रोगराई पसरण्याचा धोकाही निर्माण झाला आहे. असेही सदरील निवेदनात नमूद करण्यात आले आहे. महाराष्ट्र शासनाच्या नागरिकांची सनद (सुधारित) 2004 शासन निर्णयाप्रमाणे पृष्ट क्रमांक 28 परिशिष्ट 64 तसेच नागरी घनकचरा व्यवस्थापन व हाताळणी अधिनियम 2016 अन्वये नगर परिषद यांनी कारवाई करणे अनिवार्य आहे. असे असतांना देखील संबंधितावर कारवाई न करता नगरपालिकेचे कर्मचारी या बाबीकडे दुर्लक्ष करत असल्याचा आरोपही सदरील निवेदनात करण्यात आला आहे. तसेच अन्न व भेसळ कार्यालयास पत्र काढून उपमुख्य अधिकारी कारवाई करण्यास टाळाटाळ करत असल्याचाही आरोप सदरील निवेदनामध्ये करण्यात आला आहे.

अन्न व भेसळ विभागाने झटकले हात

या प्रकरणी अन्न व भेसळ विभागाचे सहाय्यक आयुक्त तथा पदावधित अधिकारी शि.वा.कोडगीरे यांनी तक्रारदार देवणीकर यांना या प्रकरणाचा अर्थात अर्जात नमुद मुद्य् क्र.एक ते चोविस हे या कार्यालयाशी संबंधीत नाही.तसेच उदगीर सिठी कार्यरत अन्न व भेसळ सुरक्षा अधिकारी हे कोरोना संदर्भातील कामासाठी जिल्हाधिकारी कार्यालयात कार्यरत आहेत.तेथुन कार्यमुक्त झाल्यानंतर योग्य निर्णय घेतील असे कळवले आहे.वरिष्ठ पातळीवरून असे पत्र आल्याने देवणीकर हतबल झाले असले तरी आंदोलन चालूच ठेवले आहे.