लातूर (एल पी उगीले)विद्यार्थ्यांमध्ये कायद्याविषयी जागरूकता निर्माण व्हावी, डिजिटल माध्यमांचा सुरक्षित वापर करण्याची जाणीव व्हावी, तसेच त्यांना भविष्यातील करिअरच्या दृष्टीने योग्य दिशा मिळावी, या उद्देशाने रेणापूर पोलीस ठाण्याच्या वतीने छत्रपती शिवाजी विद्यालय, रेणापूर येथे विद्यार्थ्यांसाठी विशेष मार्गदर्शनपर संवाद कार्यक्रमाचे आयोजन करण्यात आले. या कार्यक्रमात उपविभागीय पोलीस अधिकारी, रेणापूर राजेंद्र मायने यांनी इयत्ता आठवी ते दहावीच्या विद्यार्थ्यांशी संवाद साधत विविध महत्त्वपूर्ण विषयांवर सविस्तर मार्गदर्शन केले. यावेळी शाळेतील आठ शिक्षक आणि एकूण 80 विद्यार्थी उपस्थित होते.
यावेळी मायने यांनी विद्यार्थ्यांना सोशल मीडियाचा वापर करताना घ्यावयाची काळजी, सायबर गुन्ह्यांचे विविध प्रकार, ऑनलाइन फसवणूक, अनोळखी लिंक, बनावट संदेश तसेच वैयक्तिक माहितीची सुरक्षितता याबाबत मार्गदर्शन केले. सोशल मीडियाचा वापर ज्ञान आणि प्रगतीसाठी करावा; त्याचा गैरवापर होणार नाही याची प्रत्येक विद्यार्थ्याने दक्षता घ्यावी, असे त्यांनी सांगितले.
तसेच समाजात घडणाऱ्या विविध प्रकारच्या गुन्ह्यांची माहिती देत गुन्हेगारीपासून दूर राहण्याचे महत्त्व त्यांनी विद्यार्थ्यांना पटवून दिले. नवीन फौजदारी कायद्यांची माहिती देऊन कायद्याचे ज्ञान प्रत्येक नागरिकाला असणे का आवश्यक आहे, हे विविध उदाहरणांच्या माध्यमातून स्पष्ट केले.
विद्यार्थ्यांच्या भविष्याचा विचार करता स्पर्धा परीक्षांची तयारी कशी करावी, त्यासाठी अभ्यासाचे नियोजन, वेळेचे व्यवस्थापन, सातत्य, शिस्त आणि निश्चित ध्येय असणे किती महत्त्वाचे आहे, याबाबतही त्यांनी मार्गदर्शन केले. तसेच भारतीय संस्कृती, संस्कार, कुटुंबव्यवस्था, ज्येष्ठांचा आदर आणि सामाजिक जबाबदारी यांचे महत्त्व विशद केले.
पोलीस आणि विद्यार्थी यांच्यातील संवाद हा केवळ समजावून सांगण्यापुरता मर्यादित नसून, विद्यार्थ्यांच्या व्यक्तिमत्त्व विकासाला दिशा देणारा आणि त्यांना भविष्यात एक जबाबदार व सुजाण नागरिक बनविणारा असला पाहिजे**, या व्यापक उद्देशाने हा संवाद साधण्यात आला.
विद्यार्थ्यांनी केवळ परीक्षेत यश मिळविण्याचे ध्येय न ठेवता चांगले संस्कार, सामाजिक भान, कायद्याचा आदर आणि नैतिक मूल्ये जोपासत जबाबदार नागरिक म्हणून स्वतःची जडणघडण करावी, असा संदेश श्री. मायने यांनी यावेळी दिला.
रेणापूर पोलीस ठाण्याच्या वतीने आयोजित या उपक्रमातून विद्यार्थ्यांना पोलीस प्रशासनाची कार्यपद्धती, कायदेविषयक जागरूकता, सायबर सुरक्षितता आणि करिअर नियोजनाबाबत उपयुक्त माहिती मिळाली. अशा संवादातून पोलीस आणि विद्यार्थ्यांमधील विश्वासाचे नाते अधिक दृढ होण्यास मदत होत आहे.
Leave a Reply