निडवदे अण्णाची आठवण देखील कार्यकर्त्यांना ऊर्जा देते - बसवराज रोडगे

उदगीर (एल. पी. उगिले) : भारतीय जनता पार्टीचे माजी जिल्हाध्यक्ष, गोदावरी विकास महामंडळाचे माजी उपाध्यक्ष नागनाथअण्णा निडवदे यांना कोरोनाने आपल्यातून हिरावून नेले आहे. नागनाथअण्णा निडवदे यांनी आपले संपूर्ण आयुष्य भारतीय जनता पार्टीच्या प्रचार आणि प्रसारासाठी खर्ची घातले. राष्ट्रीय स्वयंसेवक संघाच्या तालमीतून निर्माण झालेला एक सच्चा कार्यकर्ता म्हणून त्यांनी वाडी, तांडा, गाव, शहर या पातळीवरून घराघरापर्यंत भारतीय जनता पार्टीची विचारधारा पोंहचवली, आज त्यांची आठवण देखील कार्यकर्त्यांना ऊर्जा देऊन जाते. नवनिर्मितीचा मंत्र देते. असे विचार भारतीय जनता पार्टीचे तालुकाध्यक्ष बसवराज रोडगे यांनी व्यक्त केले.

ते नागनाथअण्णा निडवदे यांच्या जयंतीनिमित्त आयोजित अभिवादन कार्यक्रमात बोलत होते. भारतीय जनता पार्टीच्या वतीने आपल्या लाडक्या नेत्याच्या आठवणी विविध कार्यक्रमाचे आयोजन करण्यात आले होते. महा रक्तदान शिबिर ही संपन्न झाले. अभिवादन कार्यक्रमाच्या वेळी ओबीसी प्रदेश सचिव धर्मपाल दादा नादरगे, युवा मोर्चाचे तालुकाध्यक्ष अमोल निडवदे, भारतीय जनता पार्टीचे जिल्हा उपाध्यक्ष दिलीप मजगे, लातूर जिल्हा भारतीय जनता किसान मोर्चाचे सरचिटणीस लक्ष्मण फुलारी, नगरसेवक नागेश आष्टुरे, अमोल अनकल्ले, अमर पवार, धनराज नादरगे, मयूर पटणे इत्यादी उपस्थित होते. महारक्तदान सोहळ्याच्यावेळी भाजपाचे जेष्ठ नेते जिल्हा परिषदेचे उपाध्यक्ष रामचंद्र तिरुके, राष्ट्रवादी युवक काँग्रेसचे जिल्हाध्यक्ष चंदन भैय्या पाटील नागराळकर यांच्यासह सर्व पक्षातील नेते मंडळी मोठ्या संख्येने उपस्थित होते. अभिवादन प्रसंग बसवराज रोडगे यांनी नागनाथअण्णा निडवदे यांच्या कामकाजाची पद्धत आणि जुन्या आठवणी सांगितल्या. कार्यकर्त्यांनी नागनाथअण्णा निडवदे यांनी भारतीय जनता पक्षाच्या वाढीसाठी घेतलेले कष्ट डोळ्यासमोर ठेवून काम करावे. असे आवाहनही त्यांनी केले.