लातुरात आठवणीतील स्व. संगमेश्वर बोमणे यांच्या नावाने संगम पार्क

लातूर (प्रतिनिधी) : लातूर शहरात गेली अनेक वर्षांपासून पासून स्व. संगमेश्वर बोमणे यांनी ग्रीन लातूर वृक्ष टीमला सातत्याने केलेल्या मदतीच्या ऋणातून मुक्त होण्यासाठी ग्रीन लातूर वृक्ष व
रोटरी क्लब ऑफ लातूर यांच्या सौजन्याने लातूर शहरातील बार्शी रोड परिसरातील विठ्ठल रुक्मिणी नगर येथील ग्रीन बेल्ट मध्ये आठवणीतील स्व. संगमेश्वर बोमणे यांच्या नावाने संगम पार्क विकसित करण्याचा उपक्रम हाती घेण्यात आला आहे.

शहरातील विठ्ठल रुक्मिणी नगर येथील संगम पार्क येथे जवळपास २६० झाडे लावण्यात आली. त्यात आंबा, करंज, वड, पिंपळ, पेरू, सिंगापूर चेरी, टरमेनिलीया, कडुनिंब, बकुळ, सीताफळ, नारळ, आवळा, बेल, तुळस, कनेरी, टीकोमा, गुलाब, जास्वंद, लिली, तगर, स्वस्तिक अशी विविध प्रजातींची झाडे-फुलझाडे लावत झाडांना काठ्या लावण्यात आल्या तसेच झाडांचे वॉकिंग ट्रॅक करून ग्रीन बेल्ट च्या मध्यभागी मुलांना खेळण्यासाठी मोकळी जागा उपलब्ध करून देण्यात आली आहे.

ग्रीन लातूर वृक्ष टीमच्या प्रत्येक सदस्यांनी संगम पार्कचा उपक्रम यशस्वी करण्यासाठी गेल्या आठ दिवसांपासून प्रचंड मेहनत घेत १५० नवीन खड्डे खोदून व जेसीबीच्या सहाय्याने खोदलेल्या १०० खड्ड्यात मोठी झाडे लावून माती ओढण्यासारखे अत्यंत जिकरीचे कार्य करत नियोजनाप्रमाणे उपक्रम यशस्वी करण्यासाठी सर्वानी मोलाचे सहकार्य केले.

यावेळी श्रीमती पूजा संगमेश्वर बोमणे, मनपा आयुक्त अमनजी मित्तल, जेष्ठ पत्रकार जयप्रकाशजी दगडे, नगरसेवक इम्रान सय्यद,
नगरसेविका रागिणीताई यादव, डॉ.पवन लड्डा, रोटरी क्लब लातूर चे सर्व पदाधिकारी ग्रीन लातूर वृक्ष टीमचे सर्व सदस्य यश रेसिडेन्सी येथील नागरिक, महिला भगिनी व संगम हायटेक नर्सरीचे कर्मचारी मोठ्या संख्येने उपस्थित होते.