लातूरला हिरवेगार करण्यासाठी उजना येथे १५,००० वृक्षांची लागवड

अहमदपूर ( गोविंद काळे): “हरित लातूर, सुंदर लातूर” या महत्त्वाकांक्षी अभियानांतर्गत मौजे उजना, तालुका अहमदपूर येथे तब्बल १५,००० विविध प्रकारच्या वृक्षांची लागवड करण्यात आली. स्वातंत्र्याच्या अमृत महोत्सवाच्या निमित्ताने हा उपक्रम आयोजित करण्यात आला होता. या उपक्रमात स्थानिक प्रशासन, वन विभाग, शिक्षक, विद्यार्थी आणि नागरिक मोठ्या संख्येने सहभागी झाले होते.
या कार्यक्रमाला उपजिल्हाधिकारी श्रीमती मंजुषा लटपटे, तहसीलदार उज्वला पांगरकर, वनपरिक्षेत्र अधिकारी श्रीमती वर्षा नागरगोजे, मंडळ अधिकारी अनुपमा निंबाळकर आणि वन परिमंडळ अधिकारी गोविंद माळी यांची प्रमुख उपस्थिती होती. त्यांच्यासोबतच वनरक्षक विश्वनाथ होनराव, उजनाचे सरपंच कमलाकर शेकापुरे, माजी सरपंच अशोक कासले, पेमा तांडा येथील शिक्षक, विद्यार्थी, अंगणवाडी सेविका आणि बाळू राठोड व व्यंकट आमुगे यांसारखे प्रतिष्ठित नागरिक उपस्थित होते.
यावेळी बोलताना, उपजिल्हाधिकारी श्रीमती मंजुषा लटपटे यांनी पर्यावरणाचे संतुलन राखण्यासाठी वृक्षारोपणाचे महत्त्व सांगितले. त्यांनी ‘हरित लातूर, सुंदर लातूर’ या अभियानाची माहिती देऊन नागरिकांना त्यात सक्रिय सहभाग घेण्याचे आवाहन केले.
या कार्यक्रमामुळे उजना परिसरात वृक्षारोपणाबाबत जनजागृती निर्माण झाली असून, भविष्यात हा परिसर हिरवागार होण्यास मदत होईल, अशी आशा व्यक्त केली जात आहे.