हाडोळती येथील किराणा दुकान फोडणारे दोन गुन्हेगार पोलीस कोठडीत

अहमदपूर, [गोविंद काळे] – हाडोळती येथील गांधी मार्केटमधील ‘ज्ञानेश्वर किराणा’ दुकानात चोरी करणाऱ्या दोन आरोपींना अहमदपूर पोलिसांनी अवघ्या काही तासांतच अटक केली आहे. त्यांना न्यायालयात हजर केले असता, न्यायालयाने २० सप्टेंबर २०२५ पर्यंत पोलीस कोठडी सुनावली आहे.

१७ सप्टेंबर रोजी रात्री ८:३० वाजताच्या सुमारास हाडोळती येथील किराणा व्यापारी संजय वसंत पवार हे त्यांचे ज्ञानेश्वर किराणा दुकान बंद करून गावी गेले. याच रात्री अज्ञात चोरट्यांनी दुकानाच्या छताचा लोखंडी पत्रा काढून आत प्रवेश केला. चोरट्यांनी दुकानातील सुमारे २९,८४० रुपये किमतीचा माल चोरी केला. यात तेलाचे बॉक्स, बीडीचे पुडे, तंबाखू, डाळ आणि तांदळाचे कट्टे यांचा समावेश होता. एवढंच नाही, तर त्यांनी दुकानातील इतर किराणा माल जमिनीवर सांडून अंदाजे २०,००० रुपयांचे नुकसानही केले.

या घटनेची माहिती मिळताच, १८ सप्टेंबर रोजी संजय पवार यांनी अहमदपूर पोलीस ठाण्यात तक्रार दाखल केली. पोलिसांनी तात्काळ गुन्हा दाखल करून (गुन्हा रजिस्टर नंबर ६२७/२०२५) तपासाला सुरुवात केली.

पोलिसांनी उघडकीस आणला गुन्हा

उपविभागीय पोलीस अधिकारी अरविंद रायभोले आणि पोलीस निरीक्षक बी. डी. भुसनूर यांच्या मार्गदर्शनाखाली, दुरक्षेत्र हाडोळतीचे पोलीस हवालदार ज्ञानोबा येमले यांच्यासह डि.बी पथक यांनी तपास वेगाने केला. तांत्रिक माहिती आणि गुप्त बातमीदारांच्या मदतीने पोलिसांनी अवघ्या काही तासांतच दोन संशयितांना ताब्यात घेतले. त्यांची कसून चौकशी केल्यावर त्यांनी चोरीची कबुली दिली.

अटक करण्यात आलेले आरोपी

१. यादुल उर्फ टक्या महेबूब शेख (वय २२, रा. आनंदवाडी रोड, हाडोळती)

२. रूपेश शिवाजी भोगे (वय २४, रा. अण्णाभाऊ साठे चौक, हाडोळती)

चोरीचा माल हस्तगत

पोलिसांनी आरोपींकडून चोरीचा काही माल हस्तगत केला आहे, ज्याची किंमत १४,६४० रुपये आहे. यात तेलाचे बॉक्स, बीडीचे पुडे आणि तंबाखूचा समावेश आहे. उर्वरित मालाचा शोध पोलीस घेत आहेत.

अटक करण्यात आलेल्या दोन्ही आरोपींना न्यायालयात हजर करण्यात आले. न्यायालयाने त्यांना २० सप्टेंबरपर्यंत पोलीस कोठडी दिली असून, या प्रकरणाचा अधिक तपास पोलीस करत आहेत.

या जलद कारवाईमुळे हाडोळती आणि परिसरातील व्यापाऱ्यांमध्ये समाधानाचे वातावरण आहे. पोलिसांच्या सतर्कतेमुळे गुन्हेगारांना तात्काळ बेड्या ठोकण्यात यश आले आहे.