'पोलीस फ्लॅश न्यूज'च्या दणक्यामुळे अहमदपूर बसस्थानक परिसराची झाली स्वच्छता ; व्यापाऱ्यांना नोटीस

अहमदपूर ( गोविंद काळे ) अहमदपूर-लातूर रस्त्यावरील छत्रपती शिवाजी महाराज चौकातील एसटी बसस्थानक परिसरात पसरलेल्या घाणीच्या साम्राज्यावर ‘पोलीस फ्लॅश न्यूज’ने आवाज उठवल्यानंतर, अखेर नगरपालिका प्रशासनाने त्याची दखल घेत तातडीने कचरा साफ केला आहे. दोन दिवसांपूर्वी बातमी प्रकाशित होताच, ‘स्वच्छ शहराचे ढोंग’ उघड करणाऱ्या या गंभीर समस्येवर प्रशासनाला कार्यवाही करण्यास भाग पाडले.

बातमीची दखल: आरोग्य धोक्यात येताच प्रशासन खडबडले
अहमदपूर बसस्थानक परिसरातील प्रवीण किराणासमोर आणि संपूर्ण परिसरात अनेक दिवसांपासून घाणीचे ढिगारे साचले होते. ‘स्वच्छ शहर, सुंदर शहर’ अशा घोषणा देणाऱ्या नगरपालिका प्रशासन आणि एसटी महामंडळाच्या दुर्लक्षामुळे नागरिकांना नाकावर रुमाल ठेवून प्रवास करावा लागत होता, ज्यामुळे नागरिकांच्या आरोग्याचा गंभीर प्रश्न निर्माण झाला होता.

’पोलीस फ्लॅश न्यूज’ प्रतिनिधी गोविंद काळे यांनी या संदर्भात दोन्ही प्रशासनाशी संपर्क साधून त्यांची उडवाउडवीची उत्तरे आणि सहा दिवसांपासून तक्रार करूनही कार्यवाही न झाल्याचे वास्तव चव्हाट्यावर आणले होते. नगरपालिकेचे ‘स्वच्छ शहर’ अभियान केवळ कागदावरच असल्याची टीका नागरिकांनी केली होती.

आगार व्यवस्थापकांचा व्यापाऱ्यांना थेट इशारा
दरम्यान, या अस्वच्छतेची गंभीर दखल घेत महाराष्ट्र राज्य मार्ग परिवहन महामंडळ, लातूर विभागाचे आगार व्यवस्थापक, रा.प. अहमदपूर यांनी आजूबाजूच्या व्यापाऱ्यांना थेट नोटीस बजावली होती. बसस्थानक परिसरामध्ये कचरा टाकणे प्रवाशांच्या आरोग्यास धोकादायक असून, यापुढे असे केल्यास थेट पोलिस स्टेशन अहमदपूर येथे तक्रार दाखल केली जाईल, असा स्पष्ट इशारा त्यांनी दिला होता. याची प्रत मा. तहसीलदार, मा. पोलिस निरीक्षक आणि मा. मुख्याधिकारी, नगर परिषद यांनाही पाठवण्यात आली होती.

तात्काळ कार्यवाही: कचऱ्याचा ढिगारा हटला
’पोलीस फ्लॅश न्यूज’ मध्ये बातमी प्रकाशित झाल्यानंतर आणि आगार व्यवस्थापकांनी कडक भूमिका घेतल्यानंतर नगरपालिका प्रशासन खडबडून जागे झाले. बातमीचा परिणाम म्हणून, २६ सप्टेंबर, शुक्रवारी रोजी नगरपालिकेच्या कर्मचाऱ्यांनी बसस्थानक परिसरातील कचरा आणि घाणीचे ढिगारे पूर्णपणे साफ केले.

यामुळे नागरिकांना मोठा दिलासा मिळाला असून, प्रशासनाला झोपेतून जागे करण्याचे काम पत्रकारितेच्या माध्यमातून झाल्याबद्दल नागरिकांनी समाधान व्यक्त केले आहे. मात्र, स्वच्छतेची ही मोहीम कायमस्वरूपी सुरू राहून, शहरातील मुख्य रस्त्यांवर पुन्हा घाणीचे साम्राज्य पसरणार नाही, याची दक्षता नगरपालिका आणि एसटी महामंडळाने घ्यावी, अशी अपेक्षा नागरिक व्यक्त करत आहेत.