औरंगाबाद मध्ये एकाच साडीला गळफास घेऊन प्रेमी युगुलाची आत्महत्या ; दोघेही होते विवाहित !

औरंगाबाद ( प्रतिंनिधी ) : विवाहबाह्य संबंध असलेल्या प्रेमी युगुलाने एकाच साडीने गळफास घेऊन आत्महत्या केली आहे. ही घटना मंगळवारी (१० ऑगस्ट) सकाळी १० च्या सुमारास जटवाडा रोडवरील एकतानगरात उघडकीस आली. या घटनेमुळे परिसरात खळबळ उडाली आहे.

आत्महत्या केलेली प्रेयसी ही प्रियकरापेक्षा आठ वर्षांनी मोठी आहे. सीमा ईश्वर कांबळे (३५, रा. एकतानगर) आणि सचिन गंगाधर पेटारे (२७, रा. एन-१३, वानखेडेनगर, हडको) अशी प्रेमी युगुलांची नावे आहेत.

या प्रकरणासंदर्भात नातेवाईकांनी माहिती देताना सांगितले की, वानखेडेनगरातील सचिन पेटारे हा प्लंबिंग आणि बांधकामाच्या ठिकाणी मजुरीचे काम करत होता. तर सीमा हिचा पती एका गॅस एजन्सीत कामाला आहे. गेल्या दोन वर्षांपूर्वीच सचिनचा विवाह झालेला आहे आणि सीमा ही गृहिणी होती. सचिनची सीमाच्या पतीमार्फत तिच्याशी ओळख झाली होती. या ओळखीतून दोघांचे प्रेम जुळले होते. त्यांचे हे प्रेमप्रकरण सीमाच्या पतीला आणि सचिनच्या आई, बहिणीला माहिती होते. मात्र, सचिनची पत्नी या प्रेमप्रकरणापासून अनभिज्ञ होती.

सचिन आणि सीमा नेहमी एकमेकांना भेटायचे. सचिन हा काम केलेले पैसे कधीही घरी देत नव्हता. त्याची आई भाजीपाला विक्रीचा व्यवसाय करते. एक बहिण सातारा परिसरातील रुग्णालयात कामाला आहे. तर धाकटी बहिण आणि भाऊ शिक्षण घेते. त्याच्या वडिलांना अर्धांगवायूचा आजार आहे. तसेच सीमा हिला एक मुलगी आणि दोन मुले आहेत.

सचिन आणि सीमाला यापूर्वी त्यांच्या नातेवाईकांनी हे प्रेमप्रकरण थांबवा अशी समज दिली होती. मात्र, दोघेही एकमेकांना सोडायला तयार नव्हते. अखेर आज सकाळी दोघांनी एकाच साडीने छताच्या हुकाला गळफास घेतला. हा प्रकार शेजारी राहणाऱ्या तरुणांच्या निदर्शनास आला. त्यांनी तात्काळ दोघांना बेशुद्धावस्थेत घाटीत दाखल केले. मात्र, डॉक्टरांनी त्यांना मृत घोषीत केले. त्यांच्या अकस्मात मृत्यूची नोंद हर्सुल पोलीस ठाण्यात करण्यात आली आहे.