रस्ते कंत्राटदारांकडुन सक्तीच्या वसुलीमध्ये भाजपा आघाडीवर

नितीन गडकरींना लवकरच यादी सोपवू – किशोर तिवारी
यवतमाळ (प्रतिनिधी) : रस्ते कंत्राटदारांकडून सक्तीच्या वसुलीमध्ये भाजपाचे पदाधिकारी आणि कार्यकर्तेच आघाडीवर असून त्यांची यादीच नितीन गडकरी यांना सुपूर्द करणार असल्याची स्पष्टोक्ती शिवसेना नेते किशोर तिवारी यांनी दिली आहे. नितीन गडकरी यांनी महाराष्ट्रातील शिवसेना कार्यकर्ते टक्केवारी मिळावी यासाठी राष्ट्रीय महामार्गाच्या कामात अडथळे आणतात असे पत्र महाराष्ट्राचे मुख्यमंत्री उद्धवजी ठाकरे यांना लिहिले आहे. एवढेच नव्हे तर हे पत्र माध्यमांमध्ये सार्वजनिक केले. या पत्राला भरपुर प्रसिद्धी मिळावी याची व्यवस्था केली. हा प्रकार महाराष्ट्रातील महाविकास आघाडी सरकारमधील शिवसेनेने भाजपशी संबंध तोडल्यानंतर घडत आहे. ज्याप्रकारे भाजपचे सर्व प्रवक्ते राष्ट्रीय पातळीवर शिवसेनेला सोनिया सेना किंवा शवसेना किंवा उद्धवजी ठाकरे यांच्या नेतृत्वात असलेल्या महाविकास आघाडी सरकार हे महावसुली सरकार असल्याचे बोलताना थकत नाहीत त्याचाच एक प्रकार असल्याचे किशोर तिवारी यांनी म्हटले आहे. भारतात भाजपचे शेकडो लोकप्रतिनिधी व पदाधिकारी त्यांच्या नातेवाईकांच्या नावावर ठेके घेतात तसेच कामाच्या आधी टक्केवारी मिळाल्याशिवाय काम सुरु करू देत नसल्याचे दिसून आले आहे. भाजपचे अनेक लोकप्रतिनिधी व पदाधिकारी जे वसुली करतात किंवा टोल चालवत आहेत त्यांची यादी जशी नितीन गडकरी यांनी शिवसेनेच्या पदाधिकाऱ्यांना बदनाम करण्यासाठी पत्र सार्वचनिक केले आपणही करणार अशी माहीती शिवसेना नेते किशोर तिवारी यांनी आज दिली .
सन २०१४ ते २०१९ काळात नितीन गडकरींनीच महामहिम पंतप्रधानजींना पत्र लिहिले होते, पण त्या वेळी त्यांनी राष्ट्रीय महामार्गाच्या कामासाठी कमिशन गोळा करून गुंडांचा वापर करून रस्त्यांचे बांधकाम थांबवणाऱ्या भाजप खासदार आणि आमदारांची यादी दिली होती. हा प्रकार राज्य स्तरावरील नेते देवेंद्र फडणवीस यांच्या नेतृत्वात करतात तसाच वाटतो. मुख्यमंत्री उद्धवजी ठाकरे तसेच सर्व शिवसेनेतील नेते नितीन गडकरींचा आदर करतात. मात्र वाशीम येथील पोटभरू भाजप नेत्यांनी शिवसेनेच्या खासदाराला बदनाम करण्याचे षडयंत्र रचले आहे. यातुनच अपुऱ्या माहितीच्या आधारे हे सर्व घडल्याचे किशोर तिवारी यांनी म्हटले आहे .
किशोर तिवारी यांनी म्हटले आहे “मी तुम्हाला 1975 पासून ओळखतो, आम्ही बराच काळ एकत्र काम केले आणि तुम्हाला भारत सरकारचे नेतृत्व मिळावे अशी मागणी नेहमीच करत आलो आहे. त्यामुळेच मी २०१२ ते २०१९ पर्यंत भाजप सोबत काम केले. माझ्या या मागणीमुळे आपणास भाजपमध्ये त्रास झाला, मी तुम्हाला वर्षातील ३६५ दिवस २४ तास काम करतांना पाहिले आहे. व यासाठीच पुज्यनीय बाळासाहेब ठाकरे यांनी तुम्हाला रोडकरी म्हटले होते व माननीय पंतप्रधान अटलबिहारी वाजपेयी यांनी भारत सरकारच्या ग्रामीण व राष्ट्रीय रस्त्यांचे जाळे विनण्यासाठी स्पेशल टास्कफोर्स वर नियुक्त करून प्रमाणीत केले होते. मात्र आपल्या पत्रामुळे मागील २८ वर्षांपासून खासदार असलेल्या व संपूर्ण आयुष्य शेतकऱ्यांना दिलेल्या महिला लोकप्रतिनिधीची बदनामी झाली आहे. विशेष म्हणजे उच्चं विद्याविभूषित असलेल्या भावनाताई या तुम्हाला उद्धवजी नंतर सर्वाधिक मान देतात असे असतांना एकतर्फी बाजु एकूण लिहलेल्या पत्राने त्यांचा अनादर झाल्याचे किशोर तिवारी यांनी म्हटले आहे.

कार्यकर्ते बनले ठेकेदार

नितीन गडकरी हे २०१४ नंतर केंद्रीय रस्ते विकास मंत्री झाल्यानंतर भाजपाच्या अनेक नेत्यांनी ठेकेदारी सुरु केली. या नेत्यांच्या कंपन्यांनी सब कंत्राट वाटले तसेच अनेक ठिकाणी रस्ते गुणवत्ता सोडून निकृष्ट दर्जाचे रस्ते बनविल्याने वाद निर्माण झाला आहे. यामध्ये दिवाळखोर कंपनी वा कोणताही अनुभव नसताना फक्त भाजपाचे कार्यकर्ते आणि खासदार, आमदार यांना पोसण्यासाठी कंत्राट देण्यात आले आहे. यामुळे राष्ट्रीय रस्ते निर्माण प्राधिकरण ३ लाख कोटीच्या कर्जात आहे असा आरोपच किशोर तिवारी यांनी केला आहे.