बलात्कार करणाऱ्या नगरसेवक पतीवर पुन्हा विनयभंगाचा गुन्हा दाखल

उदगीर ( प्रतिनिधी ) : शहरातील एका नगरसेविकेच्या पतीने बलात्काराचा गुन्हा दाखल असतानाही त्याच महिलेचा पुन्हा विनयभंग केला असून ‘मी जगू देणार नाही’ अशी धमकी दिल्याने शहर पोलीस ठाण्यात शुक्रवारी (ता.२७) विनयभंगाचा गुन्हा दाखल करण्यात आला आहे.

याबाबत शहर पोलिस सूत्रांकडून मिळालेली अधिक माहिती अशी की, येथील नोबल कॉलनीत राहणाऱ्या एका महिलेला एक जून पासून ते २७ ऑगस्ट २०२१ पर्यंत सतत पाठलाग करून वाईट नजरेने बघणे व फिर्यादी महिलेचे समोर अश्लील भाषेत शेरेबाजी करणे, अश्लील हावभाव करीत त्रास देत होता. फिर्यादीची आई समजावून सांगण्यास गेली असता तिला ‘ती कशी जगते मी बघतो’ अशी धमकी दिली. वगैरे मजकूर फिर्यादीने शहर पोलीस ठाण्यात दाखल केलेल्या फिर्यादीत दिल्याने आरोपी नगरसेवक पती मिर्झा अक्रम बेग (रा.समतानगर) डॅम रोड उदगीर याच्याविरुद्ध शुक्रवारी (ता.२७) रात्री विनयभंगाचा गुन्हा दाखल करण्यात आला आहे.

विशेष म्हणजे एक वर्षापूर्वी बलत्कार करून जीवे मारण्याची धमकी दिल्याचा गुन्हा याच महिलेच्या फिर्यादीवरून या आरोपी वर दाखल झाला होता. या आरोपीस काही महिने अटकही झाली होती. तो जामिनावर बाहेर आल्यानंतर पुन्हा याच महिलेला त्रास देण्याच्या उद्देशाने या आरोपीने पाठलाग करून अश्लील शेरेबाजी व हावभाव करणे सुरु केले होते. अशी माहिती तपास अधिकारी तथा पोलीस उपनिरीक्षक श्री आंदोरीकर यांनी दिली आहे.

शुक्रवारी या आरोपीवर गुन्हा दाखल झाल्यानंतर शनिवारी सदर आरोपीला अटक करण्यात आली आहे. येथील न्यायालयात आरोपीला हजर करण्यात आले असता न्यायालयाने या आरोपीस जामीन दिला असल्याची माहिती शहर पोलीस निरीक्षक गोरख दिवे यांनी दिली आहे.

–चौकट……

माहिती लपवण्याचा पोलीस पॅटर्न

—

सध्या उदगीर शहर व ग्रामीण पोलीस ठाण्यात दाखल होत असलेल्या गुन्ह्यांची माहिती लपवण्याचा एक उदगीर पॅटर्न निर्माण करण्यात आला आहे. जिल्हा पोलीस अधीक्षक निखिल पिंगळे यांच्या निर्देशानुसार सोशल मीडिया ग्रुप तयार करण्यात आला असला तरी या ग्रुपवर अशा गंभीर गुन्ह्यांची माहिती लपवण्याचे काम गेल्या कित्येक दिवसापासून सुरू आहे. त्यामुळे गुन्हे लपवण्या मागे पोलिसांचा इंटरेस्ट काय? हा प्रश्न निर्माण झाला आहे.