पाच वर्षांखालील प्रत्येक बालकाला पोलिओ लस देणे आवश्यक : शिवकर्णा अंधारे

उदगीर, प्रतिनिधी : पोलिओमुक्त भारताचे स्वप्न साकार करण्यासाठी प्रत्येक पालकाने आपल्या पाच वर्षांखालील बालकाला पोलिओची लस देणे अत्यंत आवश्यक आहे. पोलिओ लसीकरणामुळे बालकांचे आरोग्य सुरक्षित राहते आणि आयुष्यभरासाठी अपंगत्वाचा धोका टाळता येतो. त्यामुळे कोणतेही बालक लसीकरणापासून वंचित राहू नये, असे प्रतिपादन भाजपा महिला मोर्चा हाळी-हंडरगुळी मंडळाच्या तालुकाध्यक्षा तथा ग्रामपंचायत सदस्या शिवकर्णा सोनबा अंधारे यांनी केले.

तालुक्यातील सोमनाथपूर येथे जिल्हा परिषद प्राथमिक शाळा (ग्रामपंचायत प्रांगण) तसेच अंगणवाडी क्र. १ व २ येथे आयोजित राष्ट्रीय पल्स पोलिओ लसीकरण मोहिमेचा शुभारंभ गावच्या प्रथम नागरिक सरपंच सौ. अंबिका ज्ञानेश्वर पवार यांच्या हस्ते बालकांना पोलिओचे दोन थेंब पाजून करण्यात आला. यावेळी ग्रामस्थ, पालक आणि आरोग्य विभागाच्या कर्मचाऱ्यांच्या उपस्थितीत लसीकरण मोहिमेला उत्साहपूर्ण सुरुवात झाली.

कार्यक्रमात बोलताना शिवकर्णा अंधारे म्हणाल्या की, लहान मुले हे देशाचे भावी नागरिक असून त्यांचे निरोगी आरोग्य ही समाजाची सामूहिक जबाबदारी आहे. पोलिओसारख्या गंभीर आजारावर प्रभावी प्रतिबंध म्हणजे वेळेवर दिली जाणारी पोलिओ लस होय. शासन आणि आरोग्य विभाग सातत्याने जनजागृती करून प्रत्येक बालकापर्यंत लसीकरण पोहोचविण्याचा प्रयत्न करीत आहेत. या प्रयत्नांना यशस्वी करण्यासाठी पालकांनीही स्वतःहून पुढाकार घेऊन आपल्या पाच वर्षांखालील प्रत्येक बालकाला पोलिओचे डोस देणे आवश्यक आहे.

त्यांनी पुढे सांगितले की, काही वेळा बालकाला नियमित लसीकरण झालेले असले तरी राष्ट्रीय पल्स पोलिओ मोहिमेदरम्यान दिले जाणारे अतिरिक्त पोलिओ डोसही तितकेच महत्त्वाचे असतात. त्यामुळे कोणत्याही गैरसमजाला बळी न पडता सर्व पालकांनी आपल्या मुलांना लसीकरण केंद्रावर आणावे. एकही बालक लसीकरणापासून वंचित राहू नये, यासाठी गावपातळीवरील लोकप्रतिनिधी, आशा वर्कर, अंगणवाडी सेविका आणि आरोग्य कर्मचारी यांनी समन्वयाने काम करावे, असेही त्यांनी नमूद केले.

या लसीकरण मोहिमेच्या उद्घाटनप्रसंगी सरपंच सौ. अंबिका ज्ञानेश्वर पवार यांनीही पालकांना आवाहन करताना सांगितले की, निरोगी पिढी घडविण्यासाठी लसीकरण हा सर्वात प्रभावी उपाय आहे. प्रत्येक कुटुंबाने या मोहिमेत सहभागी होऊन आपल्या मुलांचे आरोग्य सुरक्षित ठेवावे. ग्रामपंचायत स्तरावरूनही आरोग्य विभागाला आवश्यक ते सहकार्य करण्यात येणार असल्याचे त्यांनी स्पष्ट केले.

यावेळी ग्रामसेवक अवकाश गणपत पवार, डॉ. कुरेशी मॅडम, डॉ. दाताळ मॅडम, अंगणवाडी सेविका, आशा कार्यकर्त्या, ग्रामपंचायत सदस्य-सदस्या तसेच मोठ्या संख्येने पालक उपस्थित होते. उपस्थित आरोग्य कर्मचाऱ्यांनी पालकांना पोलिओ लसीकरणाचे महत्त्व, त्याबाबत घ्यावयाची काळजी आणि नियमित लसीकरणाचे फायदे याविषयी मार्गदर्शन केले.

कार्यक्रमानंतर गावातील विविध भागांतील बालकांना पोलिओ लस देण्याचे काम सुरू करण्यात आले. पालकांनीही उत्स्फूर्त प्रतिसाद देत आपल्या बालकांना लसीकरण केंद्रावर आणले. पोलिओमुक्त समाज घडविण्यासाठी प्रत्येक नागरिकाने जबाबदारीची जाणीव ठेवून आरोग्य विभागाच्या या लोकहिताच्या मोहिमेला सहकार्य करावे, असे आवाहन शेवटी शिवकर्णा अंधारे यांनी केले.