दारू पिताना झालेल्या भांडणातून मित्राचा खून

पिंपरी (योगिता कोरे) : पार्टीमध्ये दारू पिताना मित्रांमध्ये वाद झाला. या भांडणातून सराईत गुन्हेगाराने बिअरची बाटली फोडून काचेने तरुणाच्या गळ्यावर वार केले. यात त्याचा मृत्यू झाला. चिंचवडेनगर, चिंचवड येथे मंगळवारी (दि.४) रात्री ही घटना घडली.

अभिजित व्यंकट पवार (वय २२, रा. सायली कॉम्प्लेक्स रोड, वाल्हेकरवाडी, चिंचवड) असे खून झालेल्या तरुणाचे नाव आहे. अमर व्यंकट पवार (वय २७) यांनी बुधवारी (दि.५) चिंचवड पोलीस ठाण्यात फिर्याद दिली.

पोलिसांनी दिलेल्या माहितीनुसार, मित्राचा वाढदिवस असल्याने मयत अभिजित, आरोपी अमित लगस आणि इतर मित्र पार्टी करण्यासाठी चिंचवडेनगर, चिंचवड येथे एका हॉटेलच्या पाठीमागे बसले होते. त्यावेळी त्यांच्यात वाद झाला. चिडलेल्या आरोपी लगस थाने बिअरची बाटली फोडून मयत अभिजित याच्या गळ्यावर वार केले. यात त्याचा मृत्यू झाला. त्यानंतर आरोपी पळून गेले. याबाबत माहिती मिळताच पोलिसांनी घटनास्थळी धाव घेतली. आरोपींची नावे निष्पन्न झाली आहेत. आरोपींच्या शोधासाठी पोलिसांची पथके रवाना झाली आहेत.