तिघांना मारहाण; ११ महिलांवर गुन्हा दाखल

पिंपरी (रफिक शेख) : आरडाओरडा करत शिवीगाळ करून तिघांना मारहाण केली. याप्रकरणी ११ महिलांच्या विरोधात गुन्हा दाखल करण्यात आला. लक्ष्मीनगर, जुनी सांगवी येथे गुरुवारी (दि. १७) दुपारी दीडच्या सुमारास ही घटना घडली. संगीता अंकुश कवडे (वय ५५, रा. लक्ष्मीनगर, जुनी सांगवी) यांनी याप्रकरणी सांगवी पोलीस ठाण्यात फिर्याद दिली. त्यानुसार शुभांगी अविनाश कवडे (रा. चिंचवड) आणि इतर १० महिलांच्या विरोधात पोलिसांनी गुन्हा दाखल केला.

पोलिसांनी दिलेल्या माहितीनुसार, फिर्यादी घरी असताना त्यांना ओरडण्याचा आवाज आला. त्यामुळे त्यांनी खाली बघितले असता त्यांची सून आरोपी शुभांगी कवडे आणि इतर आरोपी महिला ओरडून शिवीगाळ करत होत्या. शुभांगी आणि सहा महिलांनी फिर्यादीच्या बिल्डिंगच्या शॉपमध्ये असलेले भाडेकरूंना आणि त्यांचे कामगार दिनेश जगाराम कुमार, शाहबाजअली हासीमअली शेख, मुलाभाई वज्जाभाई प्रजापती यांना हाताने मारहाण केली. इतर महिलांनी बाजूला थांबून शिवीगाळ केली.