भरदिवसा घरफोडी चार लाखांचा ऐवज लंपास

पिंपरी (रफिक शेख) : कुटुंबीयांसह यात्रेला गेलेल्या बांधकाम व्यावसायिकाच्या घराचे लॉक तोडून अनोळखी तीन चोरट्यांनी घरात प्रवेश केला. घरातून दागिने रोकड तसेच गॉगल्स असा चार लाख ९९ हजार ८२७ रुपयांचा मुद्देमाल चोरून नेला. पुनावळे येथे रविवारी (दि. ३) दुपारी पावणे दोन ते अडीच या कालावधीत घरफोडीचा प्रकार घडला. अनुप संजय तापकीर (वय ३१, रा. पुनावळे) यांनी याप्रकरणी सोमवारी (दि. ४) वाकड पोलीस ठाण्यात फिर्याद दिली. त्यानुसार पोलिसांनी तीन अनोळखी चोरट्यांच्या विरोधात गुन्हा दाखल केला.

पोलिसांनी दिलेल्या माहितीनुसार, फिर्यादी तापकीर हे बांधकाम व्यावसायिक आहेत. ते रविवारी दुपारी पावणे दोनच्या सुमारास त्यांच्या कुटुंबीयांसह यात्रेनिमित्त पिरंगुट येथे गेले. त्यानंतर तीन अनोळखी चोरट्यांनी फिर्यादीच्या घराचे लॉक तोडून घरामध्ये प्रवेश केला. सोन्याचे दागिने, रोख रक्कम, गॉगल्स, असा चार लाख ९९ हजार ८२७ रुपये किमतीचा मुद्देमाल चोरट्यांनी चोरून नेला, दुपारी अडीचच्या सुमारास घरफोडीचा हा प्रकार उघडकीस आला. दरम्यान शहर परिसरामध्ये चोरीच्या घटना वाढल्याने नागरिकांमधून चिंता व्यक्त होत आहे. पोलिसांनी रात्रीच्या वेळी गस्त वाढवावी, अशी मागणी परिसरातील नागरिकांमधून होत आहे.