महिलेने पतीला ‘सॉरी’ मेसेज पाठवत केली आत्महत्या
पुणे (प्रतिनिधी) : कोथरूड परिसरात एका महिलेने पतीला ‘सॉरी’ असा एसएमएस पाठवत आत्महत्या केल्याची धक्कादायक घटना उघडकीस आली आहे. या आत्महत्येबाबत महिलेच्या नातेवाइकांनी संशय व्यक्त केला आहे.
प्रीती दीपक काकडे (वय ३१, परिणिती अपार्टमेंट, कोथरूड) असे आत्महत्या केलेल्या महिलेचे नाव आहे. या प्रकरणी कोथरुड पोलिस ठाण्यात गुन्ह्याची नोंद करण्यात आली आहे. पोलिसांनी दिलेल्या प्राथमिक माहितीनुसार, प्रीती काकडे पतीसह कोथरूड परिसरात वास्तव्यास होत्या. त्यांचे पती नामांकित खासगी कंपनीत इंजिनीअर आहेत. पती-पत्नीमध्ये किरकोळ कारणावरून वाद झाला होता. शुक्रवारी सकाळी पती नोकरीवर गेले होते. त्यानंतर महिलेने पतीच्या मोबाइलवर ‘सॉरी’ असा मेसेज पाठवून घरात गळफास घेतला. मेसेज मिळाल्यानंतर पतीने तत्काळ घराकडे धाव घेतली. त्यानंतर घराचा दरवाजा तोडून आत प्रवेश केला, त्या वेळी प्रीती निपचित पडलेल्या दिसून आल्या. त्यांनी उपचारासाठी प्रीती यांना ससून रुग्णालयात दाखल केले; परंतु डॉक्टरांनी त्यांना मृत घोषित केले. त्यानंतर पतीने याची माहिती पोलिसांनी दिल्यानंतर ते घटनास्थळी दाखल झाले. परंतु कुटुंबीयांच्या आरोपामुळे या मृतदेहाचे नातेवाइकांच्या उपस्थितीमध्ये शवविच्छेदन केले जाणार आहे. महिलेने आत्महत्या केली, त्या वेळी त्यांची पाच वर्षांची मुलगी शेजारच्या खोलीत असल्याचे समोर आले आहे. या प्रकरणी कोथरूड पोलिस तपास करत आहेत.
About The Author
