शेल्हाळ शिवारातील जुगारावर धाड, लाखोंचा मुद्देमाल जप्त

उदगीर (एल पी उगिले) : उदगीर तालुक्यातील ग्रामीण भागात लपून छपून शेतामध्ये वेगवेगळ्या ठिकाणी जुगाराचे अड्डे मांडले जात आहेत. अशाच एका जुगाराच्या अड्याच्या संदर्भात अर्थात शेल्हाळ शिवारातील शेतामध्ये असणाऱ्या शेडमध्ये जुगार सुरू असताना पोलिसांनी धाड टाकून आठ जनाविरुद्ध गुन्हा दाखल केला आहे.
या जुगारात तब्बल एक लाख 14 हजार रुपयांचा मुद्देमाल पोलिसांनी जप्त केला आहे. उदगीर तालुक्यातील शेल्हाळ शिवारात शेतामध्ये असणाऱ्या शेडमध्ये जुगार सुरू असल्याची माहिती उदगीर ग्रामीण पोलीस ठाण्यातील पोलीस कर्मचारी विशाल गुंडरे यांना समजताच, त्यांनी या संदर्भात वरिष्ठांना माहिती दिली. आणि शेल्हाळ शिवारातील पत्र्याच्या शेडमध्ये चालू असलेल्या जुगार अड्ड्यावर धाड टाकून महारुद्र अण्णाराव पटवारी, बालाजी नरसिंग माने, किसन नर्सिंग लिंबाळे, वीरेश पंचया स्वामी, आकाश चंद्रकांत बिरादार, अतुल बाबुराव शेळके, अंबादास रमेशराव शेळके, अमोल बालाजी ढोणे यांना जुगार खेळताना पकडण्यात आले. त्यांच्याकडून रोख रक्कम, जुगाराचे साहित्य असा एक लाख 14 हजार पन्नास रुपयांचा मुद्देमाल पोलिसांनी जप्त केला आहे. पोलिसांच्या या कामगिरीबद्दल जनतेमध्ये समाधान व्यक्त करण्यात येत आहे.