अक्षरनंदन शाळेत महिला क्रीडा स्पर्धा संपन्न

उदगीर (एल.पी.उगीले) : येथील उपक्रमाशील अशा अक्षरनंदन शाळेत महिला पालक क्रीडा स्पर्धा व हळदी कुंकू कार्यक्रम आयोजित करण्यात आला होता. या कार्यक्रमाला अध्यक्ष म्हणून समर्थ सेवाभावी संस्थेच्या अध्यक्षा भारतबाई सावळे उपस्थित होत्या, तर उद्घाटक म्हणून शिल्पा भंडे सचिव, इनरव्हील क्लब या उपस्थित होत्या. तर प्रमुख पाहुणे म्हणून स्नेहलता चनगे उपस्थित होत्या. प्रतिमेचे पूजन व दीपप्रज्वलना नंतर रंजना शिंदे यांनी जिजाऊ वंदना सादर केली. त्याचबरोबर शाळेतील मुलींनी स्वागत गीत सादर करून स्वागत केले. तसेच सर्वच मान्यवरांचे शाल,पुष्पहारणे सत्कार करण्यात आला. त्यानंतर पाककला या दालनाचे उद्घाटन मान्यवरांच्या उपस्थित फीत कापून करण्यात आले.

या कार्यक्रमात महिलांसाठी संगीत खुर्ची, तळ्यात मळ्यात, फुगा फोडा आणि पाककला या स्पर्धा घेण्यात आल्या. या स्पर्धांना महिला पालकांनी भरभरून प्रतिसाद दिला.सर्वच महिला पालकांनी उत्साहाने स्पर्धेत खेळून स्पर्धेचा आनंद घेतला. कार्यक्रमाची सांगता हळदीकुंकू, तिळगुळ व वान देऊन करण्यात आली. या कार्यक्रमाचे सूत्रसंचालन सुनिता तोडकरे यांनी केले, तर अरुणा वाघमारे यांनी आभार मानले. या कार्यक्रमाला शाळेतील सर्व महिला शिक्षिका व शिक्षक उपस्थित होते.