औसा विशेष पथकाची कारवाई, 08 मोटारसायकलीसह 2,10,000/- रुपयांचा मुद्देमाल हस्तगत

लातूर (एल.पी.उगीले) : या बाबत थोडक्यात हकीकत अशी की, पोलीस अधीक्षक सोमय मुंडे यांनी लातूर जिल्ह्यात घडलेल्या मालाविषयक गुन्ह्याचे विशेषतः मोटारसायकल चोरी चे गुन्हे उघडकीस आणण्यात करिता निर्देशित केले होते. त्या अनुषंगाने अपर पोलीस अधीक्षक डॉ.अजय देवरे यांचे मार्गदर्शनात पोलीस ठाणे स्तरावरील पोलीस पथका कडून जिल्ह्यामध्ये घडलेल्या मालाविषयक गुन्ह्याचे विशेषतः मोटारसायकल चोरी संबंधाने घडलेल्या गुन्ह्याच्या तपासाचे अनुषंगाने विशेष मोहीम राबविण्यात येत आहे.सदर मोहीम अंतर्गत उपविभागीय पोलीस अधिकारी, औसा मधुकर पवार यांचे मार्गदर्शन व पोलीस निरीक्षक शंकर पटवारी यांचे नेतृत्वात औसा पोलीस स्टेशनचे पोलीस अधिकारी व अमलदार यांचे विशेष पथक तयार करून पथकातील पोलीस अधिकारी व अंमलदार यांना वरिष्ठाकडून वेळोवेळी सूचना व मार्गदर्शन करण्यात येत होते.

सदर पथक पोलीस ठाणे हद्दीतील घडलेल्या मालाविषयक गुन्ह्याच्या तपासाचे व उघडकीस आणण्याच्या अनुषंगाने प्रयत्न करीत असताना दिनांक 18/02/2023 रोजी पथकास गोपनीय माहिती मिळाली की, पोलीस ठाणे औसा येथे दाखल असलेल्या गुन्हा रजिस्टर क्रमांक 76/2023 कलम 379 भादवी मधील एरंडी सारोळा येथे राहणारा इसम मोटारसायकल चोरीतील संशयित असण्याची शक्यता आहे. अशी माहिती मिळाल्याने माहितीची शहनिशा व विश्लेषण करून सदर पथकने आरोपी शोध घेतले असता मोटर सायकल चोरीच्या गुन्ह्यातील संशयित तानाजी रामराव शिंदे (वय 28 वर्ष रा. एरंडी सारोळा ता. औसा जि. लातूर) यास त्यांचे राहते ठिकाणाहून दिनांक 19/03/2023 रोजी ताब्यात घेऊन त्यांच्याकडे सखोल विचारपूस केली असता त्यांनी पोलीस ठाणे औसा हद्दीतील विविध ठिकाणाहून मोटारसायकल चोरी करून कमी किमतीत मोटरसायकल विकल्याचे सांगितले. त्यावरून अधिक तपास करून नमूद पथकाने त्याच्याकडून 8 मोटरसायकली जप्त केल्या आहेत. तसेच नमूद आरोपीना गुन्ह्यात अटक करण्यात आलेली आहे.

नमूद आरोपीकडून आणखीन गुन्हे उघड होण्याची शक्यता असून सदर गुन्ह्याचा पुढील तपास पोलीस ठाणे औसा चे पोलीस अमलदार महारुद्र डीगे हे करीत आहेत. औसा पोलीस ठाण्याच्या पथकाने उत्कृष्टरित्या तपास करून मोटरसायकल चोरीच्या तीन गुन्ह्याची उकल करून 8 मोटार सायकलसह 2 लाख 10 हजार रुपयाचा मुद्देमाल जप्त करण्यात आलेला आहे.सदरची कारवाई वरिष्ठांचे मार्गदर्शनात व पोलीस ठाणे औसा चे पोलीस निरीक्षक शंकर पटवारी यांचे नेतृत्वात पोलीस उपनिरीक्षक इक्बाल शेख नितीन गायकवाड , पोलीस अमलदार महारुद्र डीगे ,समीर शेख, नवनाथ चामे, मदार बोपले, सय्यद मुबाज यांनी पार पाडली.