महात्मा फुले महाविद्यालयात लोकमान्य टिळक व चंद्रशेखर आझाद यांची जयंती साजरी

अहमदपूर, ( गोविंद काळे)
येथील महात्मा फुले महाविद्यालयात राष्ट्रीय सेवा योजना व सांस्कृतिक विभागाच्या वतीने प्राचार्य डॉ. वसंत बिरादार पाटील यांच्या मार्गदर्शनाखाली भारतीय असंतोषाचे जनक, थोर स्वातंत्र्य सेनानी लोकमान्य बाळ गंगाधर टिळक यांची तसेच थोर स्वातंत्र्य सेनानी क्रांतिकारी चंद्रशेखर आजाद यांच्या जयंतीनिमित्त त्यांना अभिवादन करण्यात आले.
याबाबतचे सविस्तर वृत्त असे की, महात्मा फुले महाविद्यालयाच्या सांस्कृतिक व राष्ट्रीय सेवा योजना विभागाच्या वतीने घेण्यात आलेल्या या कार्यक्रमाच्या अध्यक्षस्थानी समाजशास्त्र विभाग प्रमुख तथा राष्ट्रीय सेवा योजनेचे सहाय्यक कार्यक्रमाधिकारी डॉ. सतीश ससाणे हे होते तर इंजिनीयर युवराज मोरे व अभिजीत ससाणे यांची प्रमुख उपस्थित होती. यावेळी मान्यवरांच्या हस्ते लोकमान्य टिळक व चंद्रशेखर आझाद यांच्या प्रतिमेस पुष्प अर्पण करून अभिवादन करण्यात आले.
या कार्यक्रमाचे प्रास्ताविक व सूत्रसंचालन सांस्कृतिक विभाग प्रमुख डॉ.बब्रुवान मोरे यांनी केले तर ; आभार राष्ट्रीय सेवा योजनेचे कार्यक्रमाधिकारी डॉ.पांडुरंग चिलगर यांनी मानले. यावेळी महाविद्यालयातील प्राध्यापक, कार्यालयीन कर्मचारी मोठ्या संख्येने उपस्थित होते.