विद्युत महामंडळाच्या थ्री फेज लाईनच्या तारा तुटून बाप लेकाचा मृत्यू

उदगीर ( एल.पी.उगीले ) : उदगीर तालुक्यातील मौजे बामणी येथे शनिवारी दुपारी वादळी वारा आणि जबरदस्त पावसामुळे अनेक झाडे उन्मळून पडली. गोरगरिबांच्या घरावरचे छप्पर उडून गेले. याच दरम्यान बामणी येथील शेतकरी नारायण कोंडमंगले अंदाजे वय 45 वर्ष व त्यांचा मुलगा रामेश्वर कोंडमंगले वय 15 वर्ष हे आपल्या शेतातील काम आटोपून व पावसाचा अंदाज वाटल्यामुळे घराकडे लुना वरून परत येत होते. दरम्यान रस्त्याच्या कडेलाच त्यांच्या अंगावर महावितरणची लाईटची थ्री फेज वायर तुटून पडल्यामुळे दोघांचाही जागीच मृत्यू झाला.

याच दरम्यानच्या काळात नैसर्गिक वातावरण बिघडल्यामुळे धोंडीबा माधवराव बामणे या शेतकऱ्याला इलेक्ट्रिक वायरचा धक्का लागून हात जळाला आहे. त्याला उदगीर येथील शासकीय रुग्णालयांमध्ये उपचारासाठी दाखल करण्यात आले आहे. एक वर्षापूर्वी देखील रामकिशन मेहेत्रे यांची पंधरा वर्षाची मुलगी विद्युत अधिभार वाढल्यामुळे विजेचा धक्का लागून ठार झाली झाली होती.

यादरम्यान बामणी गावातील लोकांना या विद्युत महामंडळाच्या कामाबद्दल प्रचंड चीड आहे, गावातील बहुतांश लाईटचे पोल हे वाकलेले आहेत. व विद्युत प्रवाह चालू असताना अनेक घरावरून या जिवंत तारा लोंबकळत आहेत. यामुळे पुन्हा अशा घटना घडू शकतात. याचे गांभीर्य विचारात घेऊन महावितरण कर्मचारी यांना यासंदर्भात पाबंद घालायच्या सूचना करून देखील कोणीही दखल घेतली नसल्यामुळे आज दुर्दैवाने बाप लेकाचा मृत्यू झाला आहे. त्यामुळे संपूर्ण बामणी शहरात हळहळ व्यक्त केली जात आहे.

चौकट ……

यादरम्यान उदगीरचे तहसीलदार रामेश्वर गोरे यांच्याशी आमच्या प्रतिनिधीने संपर्क साधला असता, सदरील घटनेच्या अनुषंगाने महसूल प्रशासनाच्या वतीने संगीता माटरोल यांनी घटनास्थळी जाऊन पंचनामा केला आहे. या दुर्घटनेत मयत पावलेल्या दोन्ही व्यक्तीं च्या वारसांना महावितरण कडून प्रत्येकी चार लाख रुपये प्रमाणे मदत मिळू शकेल. प्रातिनिधिक स्वरूपामध्ये तातडीच्या कामकाजासाठी सोमवारी वीस हजार रुपये प्रत्येकी या प्रमाणे मदत दिली जाणार असल्याची माहिती महसूल प्रशासनाच्या वतीने रामेश्वर गोरे यांनी दिली आहे.

आमच्या प्रतिनिधीने महावितरण कंपनीच्या वरिष्ठ अधिकार्‍यांची संपर्क साधण्याचा प्रयत्न केला असता दूरध्वनीवरून संपर्क होऊ शकला नाही.