लेखिका साहित्य संमेलनाच्या स्वागताध्यक्षपदी ॲड. ज्योती काळे

अहमदपूर (गोविंद काळे) : २० आणि २१ जानेवारी रोजी अहमदपूर येथे संपन्न होणाऱ्या नवव्या मराठवाडा लेखिका साहित्य संमेलनाच्या स्वागताध्यक्षपदी येथील कॉ. श्रीनिवासजी काळे स्मृती प्रतिष्ठानच्या प्रमुख ॲड.ज्योती काळे यांची निवड करण्यात आली आहे. मसापच्या अहमदपूर शाखेच्या बैठकीत स्वागताध्यक्षपदी कोणाची निवड करावी यावर साधक-बाधक चर्चा होऊन शेवटी सर्वानुमते ॲड. ज्योती काळे यांची निवड करण्यात आली. कॉ.श्रीनिवासजी काळे स्मृती प्रतिष्ठानच्या वतीने 35वर्षे यशस्वी व्याख्यानमाला चालविण्याचा अनुभव असल्यामुळे हे संमेलनही अविस्मरणीय करण्याचा आपला निर्धार असल्याचे निवडीनंतर त्या म्हणाल्या. संस्कृती सभागृह हे या संमेलनासाठी प्रशस्त असून दोन वेगवेगळ्या मंचांवरुन दोन दिवस भरगच्च साहित्यिक कार्यक्रम घेता येतील असा विश्वासही त्यांनी यावेळी बोलताना व्यक्त केला.