श्री साई गणेश मिल्ट्री कॅम्प परिसरात श्रीराम चरण पादुकांची स्थापना

अहमदपूर (गोविंद काळे) : तालुक्यातील रुद्धा पाटी जवळ असलेल्या श्री साई गणेश मिल्ट्री कॅम्प परिसरातील श्री हनुमान मंदिरात दिनांक 22 जाने 2024 रोजी श्रीरामचरण पादुकांची स्थापना करण्यात येणार असल्याची माहिती माजी सभापती सौ. अयोध्या अशोकराव केंद्रे यांनी दिली. यावेळी त्या बोलत होत्या की भक्तीमध्ये अपारशक्ती आहे, परमेश्वराला प्रसन्न करून घेण्याची शक्ती भक्तीमध्ये आहे. अशी भक्ती करता यावी म्हणून त्यांनी मंदिर बांधलं आहे. त्यामध्ये श्रीराम चरण पादुका स्थापन करण्यात यावे म्हणून अयोध्या येथील साधू संतांकडून श्रीराम आणि सीतामाईच्या चरण पादुका व अक्षता मागविल्या आहेत. त्या चरणपादुका आल्यापासून श्री साई गणेश मिल्ट्री कॅम्प परिसरात अखंडपणे नाम जप यज्ञ, नाम संकीर्तन, पंचपकवान भोजन, दीपोत्सव सोहळा संपन्न होत आहे, त्या चरणपादुकांचा धान्यवास, फलाधीवास आणि फुलाधीवास करण्यात आला आहे. दिनांक 22 जानेवारी रोजी विधिवत पूजा अर्चना करून या चरण पादुका श्री हनुमान मंदिरात स्थापन करण्यात येणार असल्याची माहिती त्यांनी दिली.या परिसरातील सर्व भाविक भक्तांनी याचा लाभ घेतला व या अनोख्या उपक्रमाची दखल घेत लातूर जिल्ह्याचे लोकप्रिय खासदार सुधाकर श्रृंगारे यांनी सपत्नीक भेट देऊन अयोध्या केंद्रे यांचे तोंडभरून कौतुक केले.