मंगळसूत्र, गंठण चोरणाऱ्या अट्टल आरोपीला स्थानिक गुन्हे शाखे कडून अटक

लातूर (एल.पी.उगीले) : मंगळसूत्र, गंठण, चोरणाऱ्या गुन्ह्यातील आरोपीला अटक. सोन्याचे दागिने, गुन्ह्यात वापरलेली मोटार सायकल, कार असा एकूण 19 लाख 94 हजार रुपयांचा 280 ग्रॅम वजनाचा मुद्देमाल जप्त करण्यात आला आहे. स्थानिक गुन्हे अन्वेषण शाखेच्या या धडाकेबाज मोहिमेमुळे मंगळसूत्र आणि गंठण चोरीचे 16 गुन्हे उघड झाले आहेत. पोलीस अधीक्षक सोमय मुंडे यांचे मार्गदर्शनात स्थानिक गुन्हे शाखेची उल्लेखनीय कामगिरी झाली आहे.

याबाबत थोडक्यात माहिती अशी की, पोलीस अधीक्षक सोमय मुंडे यांनी लातूर जिल्ह्यामध्ये घडणाऱ्या चोरी व चैन स्नॅचिंग चे गुन्हे उघडकीस आणण्याकरिता आदेशित केले होते. त्या अनुषंगाने पोलीस अधीक्षक सोमय मुंडे, अपर पोलीस अधीक्षक डॉ.अजय देवरे, यांचे मार्गदर्शनात स्थानिक गुन्हे शाखेचे पोलीस निरीक्षक संजीवन मिरकले यांचे नेतृत्वात पोलीस अधिकारी,अमलदारांचे विशेष पथक तयार करण्यात आले होते. सदर पथकामार्फत जिल्ह्यातील विविध गुन्हेगारांची माहिती एकत्र करून त्याचे विश्लेषण करण्यात येत होते.

आरोपीचा शोध घेण्यासाठी सदर पथक रात्रंदिवस परिश्रम घेत होते. तसेच गोपनीय बातमीदार नेमून त्यांच्याकडून माहिती घेण्यात येत होती. दरम्यान 21/02/2024 विशेष पोलीस पथकाला मिळालेल्या गोपनीय माहिती वरून चोरलेले सोन्याचे दागिने विकण्याच्या प्रयत्नात असलेल्या आरोपीला गूळमार्केट परिसरातून ताब्यात घेऊन विचारपूस केली असता त्यांनी त्यांचे नाव सौदागर उर्फ विशाल मोहन रसाळ, (वय 32 वर्ष, रा. महादेवनगर, खंडापुर सद्या राहणार भामरीचौक,लातूर) असे असल्याचे सांगितले.

नमूद आरोपीला ताब्यात घेऊन सखोल विचारपूस केली असता त्याने सांगितले की, तो मागील काही वर्षापासून लातूर शहरातील रियाझ कॉलनी, पद्मा नगर, शारदा नगर, विशाल नगर, भाग्य नगर, अवंती नगर इतर विविध ठिकाणाहून रस्त्या वरून एकटी पायी जाणाऱ्या महिलांच्या गळ्यातील मंगळसूत्र, गंठण हिसका मारून,चोरून मोटार सायकल वरून निघून जाण्याचे गुन्हे केल्याचे कबूल केले.
त्यावरून लातूर जिल्ह्यातील पोलीस ठाण्यांचे अभिलेखाची माहिती घेतली असता पोलीस ठाणे शिवाजी नगर, व पोलीस ठाणे एमआयडीसी येथील मंगळसूत्र चोरीचे गुन्हे दाखल असल्याचे दिसून आले आहेत. नमूद आरोपीने वर नमूद गुन्हा पैकी 16 गुन्ह्यातील चोरलेला सोन्याचे 280 ग्रॅम वजनाचे 16 मंगळसूत्रे, गंठण व विविध दागिने काढून दिल्याने ते जप्त करण्यात आले आहे. इतर गुन्ह्यातील दागिने विकून खरेदी केलेली एक कार व मोटार सायकल असा एकूण 19,94,000/- रुपयाचा मुद्देमाल जप्त करण्यात आला आहे.
सदरची कारवाई वरिष्ठांचे मार्गदर्शनात स्थानिक गुन्हे शाखेचे पोलीस निरीक्षक संजीवन मिरकले, यांच्या नेतृत्वात सहाय्यक पोलीस निरीक्षक, वेंकटेश पल्लेवाड, प्रवीण राठोड, सपोउपनी बेल्लाळे, पोलीस अमलदार युवराज गिरी, अर्जुन राजपूत, मुन्ना मदने, खुर्रम काझी, रवि गोंदकर , दीनानाथ देवकते, यशपाल कांबळे, राजेश कंचे, मोहन सुरवसे, प्रदीप स्वामी, सायबर सेल चे संतोष देवडे, गणेश साठे यांनी केली आहे.