आ. अमित भैया देशमुख यांचा वाढदिवस उत्साहात साजरा

उदगीर (एल.पी. उगिले) : लातूरचे आमदार तथा काँग्रेस पक्षाचे नेते, माजी पालकमंत्री आ. अमित विलासरावजी देशमुख यांच्या वाढदिवसाच्या निमित्ताने उदगीर येथे विविध कार्यक्रम घेण्यात आले. यामध्ये प्राधान्याने सामाजिक व धार्मिक उपक्रमाने वाढदिवस उत्साहाच्या वातावरणात साजरा करण्यात आला. या कार्यक्रमाच्या प्रसंगी बोलताना उदगीर कृषी उत्पन्न बाजार समितीचे सभापती शिवाजीराव हुडे यांनी स्पष्ट केले की, काँग्रेस पक्षाचे ज्येष्ठ नेते आ. अमित भैय्या देशमुख हे युवकांचे प्रेरणास्थान आहेत. त्यांची सामाजिक आणि लोककल्याणकारी भूमिका सर्व कार्यकर्त्यांच्या समोर कायम राहावी, यासाठी अशा सामाजिक आणि धार्मिक उपक्रमातून वाढदिवस साजरा करणे हे कार्यकर्त्यांचे कर्तव्य आहे. लोकसभा निवडणुकीची आचारसंहिता सुरू असल्यामुळे मोठ्या प्रमाणात वाढदिवसाचे कार्यक्रम जरी घेता नाही आले तरी समाजातील गरजवंतांना मदतीचा हात देणे हे काँग्रेस संस्कृतीचे लक्षण असल्याने कार्यकर्त्यांनी तेच करणे गरजेचे आहे. तो आदर्श दृष्टिकोन डोळ्यासमोर ठेवूनच उदगीर येथे बाजार समितीच्या आवारात हमाल, मापाडी आणि बाहेरगावाहून येणाऱ्या शेतकऱ्यांसाठी पिण्याच्या पाण्याची सोय व्हावी. म्हणून पाणपोई ची सोय करणे, गरजू रुग्णांना फळे वाटप, औषधी वाटप अशा कार्यक्रमाचे नियोजन करण्यात आले असून सप्ताहभरात असे अनेक कार्यक्रम देण्यात येणार असल्याचीही माहिती त्यांनी दिली आहे.
उदगीर येथील उपजिल्हा रुग्णालया मध्ये रुग्णांना फळे वाटपाच्या कार्यक्रमाच्या प्रसंगी उदगीर तालुका काँग्रेसचे अध्यक्ष कल्याणराव पाटील, उदगीर कृषी उत्पन्न बाजार समितीचे सभापती शिवाजीराव हुडे, मंजूर खा पठाण, माजी नगराध्यक्ष उषाताई कांबळे, मधुकर एकुरकेकर, विठ्ठल वळसणे, आकाश कस्तुरे, राम काळे, बालाजी कारामुंगे, श्रीनिवास एकुरकेकर, दत्ता सगर यांच्यासह काँग्रेस पक्षाचे पदाधिकारी व कार्यकर्ते मोठ्या संख्येने उपस्थित होते.