पोस्ते पोदार लर्न स्कूल सीबीएसई इथे 2021-22 चा पहिला पालकमेळावा संपन्न

उदगीर (प्रतिनिधी) : येथील नामांकित पोस्ते पोदार लर्न स्कूल येथे शाळेत नव्याने प्रवेश घेतलेल्या मुला मुलींच्या पालकांचा मेळावा कोरोना चे सर्व नियम पाळून पार पडला. सुरुवातीला सरस्वती पूजन करण्यात आले. आणि सुमधुर स्वागत गीताने पालकांचे स्वागत करण्यात आले. शाळेविषयीचा वीडियो सुरुवातीला दाखवण्यात आला. नंतर सर्व शिक्षकांशी पालकांना परिचित करून देण्यात आले. शिक्षक शिकवत असलेले विषय आणि वर्ग यांची माहिती करून देण्यात आली. या नंतर शाळेचे प्रिन्सिपल सूर्यकांत चवळे यांनी पालकांना शाळेविषयी संपूर्ण माहिती, शाळेचे नियम, सध्या सुरू असलेले ऑनलाईन माध्यमातील शिक्षण, सीबीएसई बोर्ड, विविध उपक्रम, परीक्षा पद्धती आणि या नवीन शैक्षणिक वर्षाबद्दल मार्गदर्शन केले. शाळेने आयोजित केलेल्या या पालक मेळाव्या मुळे कोरोना काळात निर्माण झालेल्या विविध प्रश्नाची सोडवणूक करता आली आणि मनावर असलेला शिक्षणाविषयक ताण कमी झाला. असे मत उपस्थित पालक वर्गानी व्यक्त केले. पालक मेळाव्यात प्राथमिक समन्वयक वनिता सुगंधी, कनिष्ठ समन्वयक रेशमा सिद्धीकी, वरिष्ठ समन्वयक शेषराव बिरादार, उपक्रम समन्वयक स्वप्नाली पाटील आणि शाळेतील सर्व शिक्षक उपस्थित होते.