महिलांच्या गळ्यातील सोन्याचे दागिने चोरणाऱ्या महिला आरोपीला स्थानिक गुन्हे शाखेकडून अटक. 2 लाख 59 हजार रुपयांचा मुद्देमाल जप्त.

लातूर (एल.पी.उगीले) स्थानिक गुन्हे अन्वेषण शाखेच्या वतीने उत्कृष्ट कारवाई करण्यात आली आहे. घाई गर्दीचा फायदा घेऊन महिलांच्या गळ्यातील सोन्याचे दागिने चोरणाऱ्या महिलांना अटक करून दोन लाख 59 हजार रुपयांचा मुद्देमाल जप्त करण्यात आला आहे. या संदर्भातले सात गुन्हे ही उघडकीस आणले आहेत.

बस मध्ये प्रवास करीत असताना गर्दीचा फायदा घेऊन महिलांच्या गळ्यातील मंगळसूत्र,गंठण चोरणाऱ्या गुन्ह्यातील महिला आरोपीला अटक करून 2 लाख 59 हजार रुपयांचे 70 ग्राम सोन्याचे दागिने जप्त केली आहेत. या प्रकरणातील 7 गुन्हे उघड करण्यात स्थानिक गुन्हे अन्वेषण शाखेला यश आले आहे. पोलीस अधीक्षक सोमय मुंडे यांचे मार्गदर्शनात स्थानिक गुन्हे शाखेची यशस्वी कामगिरी संपन्न झाली आहे.
याबाबत थोडक्यात माहिती अशी की, पोलीस अधीक्षक सोमय मुंडे यांनी लातूर जिल्ह्यामध्ये घडणाऱ्या चोरी व चैन स्नॅचिंगचे गुन्हे उघडकीस आणण्याकरिता आदेशित केले होते. त्या अनुषंगाने पोलीस अधीक्षक सोमय मुंडे, अपर पोलीस अधीक्षक डॉ.अजय देवरे, यांचे मार्गदर्शनात स्थानिक गुन्हे शाखेचे पोलीस निरीक्षक संजीवन मिरकले यांचे नेतृत्वात पोलीस अधिकारी, अमलदारांचे पथक तयार करण्यात आले होते. सदर पथकामार्फत जिल्ह्यातील विविध गुन्हेगारांची माहिती एकत्र करून त्याचे विश्लेषण करण्यात येत होते. तसेच गोपनीय बातमीदार नेमून त्यांच्याकडून माहिती घेण्यात येत होती.
दरम्यान 22/12/2024 पोलीस पथकाला मिळालेल्या गोपनीय माहितीवरून बस मध्ये प्रवास करणाऱ्या महिलांच्या गळ्यातील चोरलेले सोन्याचे दागिने विकण्याच्या प्रयत्नात असलेल्या महिला आरोपीला होळकर नगर, साई रोड परिसरातून ताब्यात घेऊन विचारपूस केली असता त्यांनी सांगितले की, लातूर शहरातील व जिल्ह्यातील विविध पोलीस ठाण्याच्या हद्दीतील बस स्थानकामध्ये गर्दीचा फायदा घेऊन, बस मधून चढ-उतार करणाऱ्या महिलांच्या गळ्यातील मंगळसूत्र, गंठण चोरून निघून जाण्याचे गुन्हे केल्याचे कबूल केले.
त्यावरून लातूर जिल्ह्यातील पोलीस ठाण्यांचे अभिलेखाची माहिती घेतली असता पोलीस ठाणे अहमदपूर येथील मंगळसूत्र चोरीचे 3 गुन्हे, पोलीस ठाणे गांधीचौक येथील 2 गुन्हे, मुरुड व शिवाजीनगर येथील प्रत्येकी एक गुन्हा असे सात गुन्हे दाखल असल्याचे दिसून आले आहेत.
नमूद आरोपींनी वर गुन्ह्यात चोरलेला सोन्याचे 70 ग्रॅम वजनाचे सोन्याचे दागिने किंमत एकूण 2,59,000/-रुपयाचा मुद्देमाल जप्त करण्यात आला आहे.
सदरची कारवाई वरिष्ठांचे मार्गदर्शनात स्थानिक गुन्हे शाखेचे पोलीस निरीक्षक संजीवन मिरकले, यांच्या नेतृत्वात पोलीस उपनिरीक्षक संजय भोसले, पोलीस अमलदार सूर्यकांत कलमे, योगेश गायकवाड, तुळशीराम बरुरे, महिला पोलीस अंमलदार चिखलीकर, चालक पोलीस अमलदार केंद्रे यांनी केली आहे.