अहमदपूर तालुक्यातील अनेक गावांत स्मशानभूमी, दफनभूमी नाही; मरणानंतरही यातना

अहमदपूर ( गोविंद काळे): अहमदपूर तालुक्यातील अनेक गावांमध्ये स्मशानभूमी आणि दफनभूमी नसल्यामुळे, मरणानंतरही ग्रामस्थांना यातना सहन कराव्या लागत आहेत. अंत्यसंस्कारासाठी योग्य जागा नसल्याने, मृतदेहांवर उघड्यावर, नदीच्या काठावर किंवा शेतात अंत्यसंस्कार करण्याची वेळ ग्रामस्थांवर आली आहे. यामुळे मृतांचा सन्मान तर होतच नाही, पण पर्यावरणाचेही नुकसान होत आहे.
गावकऱ्यांची व्यथा : –
अनेक वर्षांपासून ही समस्या असूनही, प्रशासनाने याकडे दुर्लक्ष केले आहे. ग्रामपंचायतीच्या स्तरावर अनेक वेळा निवेदन देऊनही यावर कोणताही तोडगा निघाला नाही. पावसाळ्यात तर परिस्थिती आणखी गंभीर होते. नदी-नाले दुथडी भरून वाहत असल्यामुळे अंत्यसंस्कारासाठी जागा मिळत नाही. यामुळे अंत्यसंस्कार लांबणीवर टाकावे लागतात, ज्यामुळे कुटुंबाला मोठा मानसिक त्रास होतो. काही ठिकाणी तर अंत्यसंस्कारासाठी शेतीतळ्याजवळची जागा वापरावी लागते.
प्रशासनाचे दुर्लक्ष : –
या समस्येवर स्थानिक प्रशासनाने गांभीर्याने लक्ष देण्याची गरज आहे. प्रत्येक गावात स्मशानभूमी आणि दफनभूमीसाठी जागा उपलब्ध करून देणे आवश्यक आहे. शासनाच्या योजनांनुसार यासाठी निधीही उपलब्ध असतो, परंतु त्याचा योग्य वापर होत नाही. यामुळे गावकऱ्यांमध्ये संतापाचे वातावरण आहे.
मागणी:-
अनेक गावकऱ्यांनी आता प्रशासनाला तातडीने यावर उपाययोजना करण्याची मागणी केली आहे. प्रत्येक गावात हक्काची स्मशानभूमी आणि दफनभूमी असावी, यासाठी त्यांनी जोरदार मागणी केली आहे. प्रशासनाने याकडे लक्ष न दिल्यास आंदोलन करण्याचा इशाराही त्यांनी दिला आहे.
या गंभीर समस्येमुळे अहमदपूर तालुक्यातील अनेक गावांतील ग्रामस्थ मरणोत्तर सन्मानाच्या प्रतीक्षेत आहेत. प्रशासनाने यावर तातडीने लक्ष देऊन योग्य उपाययोजना करणे गरजेचे आहे.