वैज्ञानिक दृष्टिकोनाचा अंगीकार करा, तरच जीवनात निर्भय व यशस्वी व्हाल - प्रा. गोविंद शेळके

अहमदपूर (गोविंद काळे): या जगाची प्रगती विज्ञानाने केली आहे, परंतु बहुतांश लोक विज्ञानामुळे निर्माण झालेल्या सुखसुविधांचा वापर करतात, पण विज्ञानाची दृष्टी स्वीकारत नाहीत. जीवनात खऱ्या अर्थाने निर्भय आणि यशस्वी व्हायचे असेल तर प्रत्येक व्यक्तीने वैज्ञानिक दृष्टिकोन अंगीकारायला हवा, असे आवाहन सामाजिक कार्यकर्ते प्रा. गोविंद शेळके यांनी केले.
ते येथील महात्मा गांधी महाविद्यालयात महाराष्ट्र अंधश्रद्धा निर्मूलन समितीच्या वतीने शहीद डॉ. नरेंद्र दाभोलकर यांच्या स्मृतिदिनी आयोजित ‘दाभोलकर आणि वैज्ञानिक दृष्टिकोन’ या विषयावरील व्याख्यानात प्रमुख वक्ते म्हणून बोलत होते.
कार्यक्रमाचे उद्दिष्ट आणि प्रमुख उपस्थिती
कार्यक्रमाच्या अध्यक्षस्थानी विचार विकास मंडळाचे अध्यक्ष अॅड. किशनराव बेडकुळे होते. याप्रसंगी प्राचार्य डॉ. व्ही.पी. पवार, डॉ. चंद्रकांत उगीले, सहा. पोलिस उपनिरीक्षक आनंद श्रीमंगल, उद्धव इप्पर, डॉ. अतुल खडके, महेंद्र खडागळे, ज्ञानोबा भोसले, सुप्रिय बनसोडे आणि सय्यद तौफिक आदी मान्यवर उपस्थित होते.
विचार कधीच मरत नाहीत
आपल्या भाषणात प्रा. शेळके म्हणाले की, चार्वाकपासून ते दाभोलकर, पानसरे आणि कलबुर्गींपर्यंत अनेक महापुरुषांची हत्या इतिहासात झाली. स्वार्थाआड येणाऱ्या या महापुरुषांचा हितशत्रूंनी छळ केला किंवा त्यांची हत्या केली. परंतु, बंदूक किंवा गोळ्या विचारांना मारू शकत नाहीत, उलट त्यांच्या रक्ताच्या प्रत्येक थेंबातून अनेक वैचारिक कार्यकर्ते जन्माला येतात. हे कार्यकर्ते महापुरुषांनी दिलेले विचार समाजात पोहोचवण्याचे कार्य करतात.
ज्ञान-विज्ञानासाठी हुतात्मा झालेले पहिले भारतीय म्हणून डॉ. नरेंद्र दाभोलकरांचा आदर्श ठेवून वैज्ञानिक दृष्टिकोनाचा प्रसार करायला हवा. असे झाले तरच सर्व हुतात्मा महापुरुषांना खऱ्या अर्थाने श्रद्धांजली ठरेल, असे ते म्हणाले.
अंधश्रद्धा आणि वैज्ञानिक कसोटी
प्रा. शेळके यांनी पुढे सांगितले की, देव मानणे किंवा न मानणे हा प्रत्येकाच्या श्रद्धेचा भाग आहे, परंतु देवाच्या नावावर चालणारी कर्मकांडे, अनिष्ट रुढी आणि परंपरा माणसाने विज्ञानाच्या कसोटीवर तपासून पाहिल्या पाहिजेत. ही कसोटी ऐतिहासिक, वैज्ञानिक आणि तार्किक पुराव्यांवर आधारित असायला हवी. थोडक्यात, ज्या गोष्टी पुराव्याच्या कसोटीवर टिकत नाहीत, ती अंधश्रद्धा आहे. या अंधश्रद्धेमुळे केवळ पुजाऱ्यांचे भले होते, इतर कोणाचे नाही, असेही त्यांनी सांगितले.
कार्यक्रमाला ज्ञानोबा भोसले, शेषेराव ससाने, गणेश सूर्यवंशी, आशा रोडगे, वर्षाताई शेळके, कलावती भातंबरे, अंजली वाघंबर, पूजा गायकवाड आणि संध्या लामतुरे यांच्यासह मोठ्या संख्येने महिला, पुरुष आणि विद्यार्थी उपस्थित होते.
कार्यक्रमाचे सूत्रसंचालन प्रा. राजेंद्र गवळे यांनी केले, तर प्रा. रत्नाकर नळेगावकर यांनी डॉ. नरेंद्र दाभोलकर यांचा परिचय करून दिला. शेवटी, मेघराज गायकवाड यांनी उपस्थितांचे आभार मानले.