अहमदपूर येथे व्यापारी गुमास्ता व हमाल गणेश मंडळाचे रक्तदान शिबिर

अहमदपूर ( गोविंद काळे ) शहरातील नवा मोंढा येथील व्यापारी, गुमास्ता व हमाल गणेश मंडळाच्या वतीने यंदाही गणेशोत्सवाचे औचित्य साधून भव्य रक्तदान शिबिराचे आयोजन करण्यात आले होते. या शिबिरात १०१ रक्तदात्यांनी रक्तदान करून सामाजिक भावनेचे दर्शन घडवले.
या शिबिराचे उद्घाटन कृषी उत्पन्न बाजार समितीचे सभापती मंचकराव पाटील यांच्या हस्ते करण्यात आले. यावेळी प्रमुख पाहुणे म्हणून दिलीपराव जाधव उपस्थित होते. त्यांच्या उपस्थितीत या सामाजिक उपक्रमाची सुरुवात झाली.
शिबिर यशस्वी करण्यासाठी मंडळाच्या सर्व पदाधिकाऱ्यांनी विशेष परिश्रम घेतले. शौर्य ब्लड सेंटर, अहमदपूर यांनी रक्त संकलनाचे काम पाहिले. व्यापारी, गुमास्ता व हमाल गणेश मंडळाच्या या उपक्रमाचे अहमदपूर शहरात सर्वत्र कौतुक होत आहे.