आशा कार्यकर्ती यांचा विविध हक्कांच्या मागणीसाठी बेमुदत संप

चाकूर (सुनिल जाधव) : आशा कर्मचारी आणि आशा गटप्रवर्तक यांनी आपल्या विविध हक्कांच्या मागणीसाठी आज बेमुदत संपावर जाण्याचा निर्णय जाहीर केला आहे. इतर संघटनांनी एकत्र येऊन स्थापन केलेल्या कृती समितीच्या वतीने हा निर्णय घेण्यात आला आहे. सरकारने कोवीडच्या काळामध्ये आशा कार्यकर्ती व गटप्रवर्तक यांच्याकडून अत्यंत जोखमीत घालणारी कामे करून घेतली. मात्र या कामाचा कोणताही मोबदला आतापर्यंत दिला नाही.माझे कुटुंब माझी जबाबदारी यासारखी सर्वच कामे अतिरिक्त मोबदला न देता करून घेतलेली आहेत,आता रॅपिड ॲंटीजन टेस्ट घरोघरी जाऊन करण्याचे काम आशा कार्यकर्तीकडेच सोपवले जात आहे. कोविडच्या काळात जिवाची पर्वा न करता लढणाऱ्या आशा कार्यकर्ती व गटप्रवर्तकांवर होणारा अन्याय सहन करणे अशक्य असल्याने सिटू व समविचारी कामगार संघटनांनी बेमुदत संपावर जाण्याची घोषणा केली आहे. कोविड काळातील अतिरिक्त कामाचा मोबदला द्या,आशा व गटप्रवर्तकांना कायमचे नियुक्तीपत्र द्या,आशा व गटप्रवर्तक यांच्या नियमित वेतनात भरीव वाढ करा या हक्कांच्या मागणीसाठी हा बेमुदत संप केला जात आहे. तसेच चाकूर तालुक्यातील शहरी-ग्रामीण हॉस्पिटलचे व उपजिल्हा रुग्णालयाचे तसेच नगरपंचायत,नगरपरिषद, प्राथमिक आरोग्य केंद्रांतर्गत असलेल्या सर्व अशा कार्यकर्तीनीं एकत्र येऊन सहभागी होत चाकूर ग्रामीण रुग्णालयाचे वैद्यकीय अधिकारी श्री.दिपक लोंढे यांना याबाबतचे निवेदन देण्यात आले यावेळी आशा व गटप्रवर्तक बहुसंख्येच्या प्रमाणात उपस्थित होते.