दौंड शहरात पोलिसांच्या घरावर दरोडा; सर्वसामान्यांचे काय?

दौंड (सनी पगी) : शहरात दरोडेखोरांनी धुमाकूळ घातला असून दौंड पोलिस ठाण्याचे नाईक अण्णासाहेब देशमुख यांच्यावर त्यांच्याच घरात वार करण्यात आले. दरोडेखोरांनी तीन घरांवर दरोडे टाकून दोन ठिकाणी घरफोडी केली असून अन्य ठिकाणी चोरीचा प्रयत्न केलेला आहे. शस्त्रांचा धाक दाखवून महिलांच्या कानातील व गळ्यातील दागिने ओरबडून नेण्यात आले.

दौंड शहरात १६ ऑक्टोबर रोजी मध्यरात्री दाट लोकवस्तीच्या भागात हे दरोडे टाकण्यात आले. दौंड – गोपाळवाडी रस्त्यालगत भवानीनगर येथे दौंड पोलिस ठाण्यात कार्यरत अण्णासाहेब देशमुख यांच्या बंगल्यात दरोडेखोरांनी मध्यरात्री अडीच वाजण्याच्या सुमारास लोखंडी व लाकडी दार उचकटून आत प्रवेश केला. दरोडेखोरांनी अण्णासाहेब देशमुख यांच्या ओठांवर व दातांवर धारदार शस्त्राने वार करण्यासह पाठीवर रॅाडने मारून त्यांना जखमी केले. शस्त्रांचा धाक दाखवून त्यांच्या पत्नीच्या गळ्यातील मंगळसूत्र व कानातले दागिने, मुलांच्या पायातील चांदीच्या वाळ्या हिसकावून घेत कपाट व पाकिटातील रोख सत्तर हजार रूपये काढून दरोडेखोर निघून गेले. अण्णासाहेब देशमुख यांना ओठ आणि दाताखालच्या भागात एकूण दहा टाके पडले असून त्यांची प्रकृती स्थिर आहे. गजानन सोसायटी येथील कमल सुरेश तुपेकर यांच्या बंगल्याच्या वरच्या मजल्यावर मध्यरात्री दोन वाजता दाखल होऊन दरोडेखोरांनी त्यांच्या गळ्यातील व कानातील सोन्याचे दागिने ओरबडून काढले. त्याचबरोबर पर्स मधील रोख सहा हजार रूपये व चांदीचे पैंजण नेले. दरोडेखोरांनी कमल तुपेकर व वनिता सुरेश तुपेकर यांचे तोंड दाबले होते. तोंड दाबताच वनिता तुपकेर यांनी प्रतिकार केला व त्या दरम्यान विजेचा दिवा बंद झाल्याने दरोडेखोर पळून गेले. पहाटे साडेतीन वाजण्याच्या दरम्यान सरपंच वस्ती शेजारील ढमे वस्ती येथे किशोर दत्तात्रेय ढमे यांच्या बंगल्यात स्वयंपाकगृहाचे दार उचकटून दरोडेखोरांनी प्रवेश केला. सोन्याचे दीड तोळ्याचे दागिने व रोख साडेसहा हजार रूपये घेऊन दरोडेखोर निघून गेले.