साई ग्रामपंचायतीवर युवा परिवर्तन ग्रामविकास पॅनलचा दणदणीत विजय

दुरंगी लढत : नऊ पैकी पाच जागेवर विजयाचा झेंडा

लातूर (प्रतिनिधी) : लातूर तालुक्यातील साई ग्रामपंचायत निवडणुकीत साई युवा परिवर्तन ग्रामविकास पॅनल व साई ग्रामविकास आघाडी पॅनल यांच्यामध्ये झालेल्या चुरशीच्या लढतीमध्ये साई ग्रामपंचायतीच्या एकूण नऊ जागेपैकी पाच जागेवर साई युवा परिवर्तन ग्रामविकास पॅनलचे पाच उमेदवार विजयी झाले आहेत. तर विरोधकांना सत्‍ताधारी असतानाही चारच जागेवर समाधान मानावे लागले आहे. त्यामुळे साई युवा परिवर्तन ग्रामविकास पॅनलच्या पाचही विजयी उमेदवारांवा सत्कार भाजपा नेते तथा माजी आ.शिवाजीराव पाटील कव्हेकर यांच्याहस्ते मजगे नगर येथील कैलास निवासस्थानी करण्यात आला.

लातूर तालुक्यातील साई ग्रामपंचायतीअंतर्गत भाजपा नेते तथा माजी आ.शिवाजीराव पाटील कव्हेकर यांच्या मार्गदर्शनाखाली व अमोल पवार यांच्या नेतृत्वाखालील साई युवा परिवर्तन ग्रामविकास पॅनल व ज्ञानेश्‍वर पवार यांच्या नेतृत्वाखालील साई ग्रामविकास आघाडी पॅनल यांच्यामध्ये चुरशीची लढत झाली. यामध्ये अमोल पवार यांच्या नेतृत्वाखाली साई युवा परिवर्तन ग्रामविकास पॅनलला पाच जागेवर वर्चस्व सिध्द करता आहे. तर साई ग्रामविकास आघाडी पॅनलला सत्तेत असतानाही चार जागेवर विजय मिळाला. तर पाच जागेवर पराभवाला सामोरे जावे लागले. त्यामुळे साई युवा परिवर्तन ग्रामविकास पॅनलच्या पाचही विजयी उमेदवारांचा भाजपा नेते तथा माजी आ.शिवाजीराव पाटील कव्हेकर यांच्याहस्ते सत्कार करण्यात आला. विजयी उमेदवारात अमोल पवार, सुनिता दत्तात्रय पवार, मंगल गोरख पवार, पांडूरंग आत्माराम पवार, रानबा बन्सी क्षिरसागर आदींचा समावेश आहे. यावेळी हणमंत पवार, दयानंद पाटील, सुरज पाटील, अक्षय पाटील, विराज पवार, संतोष पवार, दत्ता बन, सिध्दाजी पवार, गोविंद पाटील, अनंतराव पवार आदींची उपस्थिती होती.