दरीत बस कोसळून चालकासह चार जखमी

कात्रज (रफिक शेख) : पुणे-सातारा महामार्गावर जुन्या कात्रज घाटातील भिलारेवाडी येथे तीव्र वळणावर मंगळवारी पहाटे बसचालकाचे नियंत्रण सुटल्याने ती उलटून दरीत कोसळली. कर्नाटकची ही बस १९ प्रवाशांना घेऊन जात होती. या अपघातात चालकासह चार जण जखमी झाले आहेत. याबाबत अधिक माहिती अशी की, कर्नाटक राज्यातील हबळी ते शिर्डीकडे जाणारी बस (केए २५ एफ ३२४८) ही मंगळवारी पहाटे तीनच्या सुमारास भिलारेवाडी येथील के ७२ हॉटेल शेजारी असलेल्या तीव्र वळणावर चालकाचे नियंत्रण सुटले आणि ती बस तीस फूट खाली खड्ड्यात कोसळली. या अपघातामध्ये बसची पलटी होऊन मोठ्या प्रमाणात नुकसान झाले आहे.चालकासह चार प्रवासी जखमी झाले असून स्थानिक नागरिक, भारती विद्यापीठ पोलिसांच्या मदतीने पोलीस उपनिरीक्षक रवींद्र गोडसे व कर्मचारी यांनी खासगी रुग्णालयात उपचारासाठी दाखल केले. घटनेची माहिती मिळताच कात्रज अग्निशमन दलाने तत्काळ पोहोचत बसचालकाला सुखरूप बाहेर काढले.