युवा नेते श्रीकांत पाटील यांचा काँग्रेस प्रवेश

उदगीर (एल.पी. उगिले)
येथील युवा नेते राष्ट्रवादी काँग्रेस पक्षाचे पदाधिकारी श्रीकांत कल्याणराव पाटील यांनी युवकांचे प्रेरणास्थान आ. अमित विलासराव देशमुख यांच्या उपस्थितीमध्ये भारतीय राष्ट्रीय काँग्रेस पक्षामध्ये आपल्या कार्यकर्त्यांसह प्रवेश केला आहे. उदगीर तालुक्यातील प्रमुख पदाधिकारी आणि कार्यकर्ते हेही याप्रसंगी उपस्थित होते. यामध्ये प्रामुख्याने उदगीर कृषी उत्पन्न बाजार समितीचे सभापती शिवाजी अण्णा हुडे, काँग्रेस पक्षाचे तालुकाध्यक्ष कल्याण पाटील, माजी नगराध्यक्ष तथा प्रदेश काँग्रेस कमिटीच्या सरचिटणीस उषा कांबळे, उदगीर कृषी उत्पन्न बाजार समितीच्या उपसभापती प्रीती चंद्रशेखर भोसले, बाजार समितीचे संचालक विधीज्ञ पद्माकर उगिले, काँग्रेस पक्षाचे शहराध्यक्ष मंजूर खा पठाण, माजी नगरसेवक राजकुमार भालेराव, महबूब शेख, संतोष बिरादार, विलास शिंदे तसेच लातूर जिल्हा परिषदेचे समाज कल्याण विभागाचे माजी सभापती मधुकरराव एकुर्गेकर इत्यादी मान्यवर उपस्थित होते.
श्रीकांत कल्याणराव पाटील हे संघटन कुशल व्यक्तिमत्व असल्यामुळे उदगीर विभागात काँग्रेस पक्षाची ताकद निश्चित वाढेल. असा विश्वास याप्रसंगी माजी पालकमंत्री आ. अमित विलासराव देशमुख यांनी व्यक्त केला. काँग्रेस पक्ष संघटन बांधणीसाठी आणि पक्ष वाढीसाठी युवकांमध्ये प्रेरणा निर्माण करण्याचे कामही ते करतील. अशी ही आशा आ.अमित देशमुख यांनी व्यक्त केली.
याप्रसंगी कल्याण श्रीकांत कल्याणराव पाटील यांचा सत्कार आणि स्वागतही करण्यात आले. सत्काराला उत्तर देताना श्रीकांत पाटील यांनी सांगितले की, ज्येष्ठ नेत्यांनी आपल्यावर जो विश्वास व्यक्त केला आहे, त्या विश्वासाला पात्र राहून आपण काँग्रेस पक्षासाठी तन मन धनाने प्रयत्न करू. पक्षश्रेष्ठींना खाली मान घालावी लागेल असे कोणतेही कार्य आपल्यातून कदापि होणार नाही, असेही त्यांनी सांगितले.