उदगीर महसूल प्रशासनाच्या कार्यालयास आयएसओ मानांकन !जिल्ह्यातील पहिला मान उदगीरला !!
उदगीर (एल.पी.उगीले) उदगीर येथील उपविभागीय अधिकारी कार्यालय तसेच उदगीरचे तहसील कार्यालय आय एस ओ मानांकित झाले आहे. जिल्हाधिकारी कार्यालय येथे मुख्यमंत्री यांच्या संकल्पनेतून शंभर दिवसाचा कृती आराखडा कार्यक्रमांतर्गत नागरिकांना सोयी सुविधा देण्याच्या दृष्टीने उपविभागीय अधिकारी कार्यालय उदगीर येथे जिल्हाधिकारी श्रीमती वर्षा ठाकूर घुगे यांच्या मार्गदर्शनाखाली कृती आराखडा राबवण्यात आला. या कृती आराखड्यांतर्गत नागरिकांच्या विविध सुविधा उपलब्ध करून देण्यात आलेल्या आहेत. याबाबतची पाहणी करण्यासाठी जिल्हाधिकारी श्रीमती वर्षा ठाकूर घुगे यांनी उपविभागीय अधिकारी कार्यालय व तहसील कार्यालय उदगीर येथे भेट दिली. उपविभागीय अधिकारी कार्यालयामध्ये प्रत्येक अधिकारी, कर्मचारी यांचे नामफलक व त्यांच्याकडे असलेल्या आस्थापने विषयीच्या कामकाजाचा उल्लेख असलेला कार्यपटल तसेच अभ्यंगताना बसण्यासाठी सुसज्ज व्यवस्था, पिण्यासाठी स्वच्छ पाणी, दिशादर्शक फलक, स्वच्छतागृह, महिलांसाठी हिरकणी कक्ष, कार्यालयात येणाऱ्या नागरिकांना अर्ज किंवा निवेदन लिहिण्यासाठी लेखन फळी, कार्यालयात अभिलेखाचे निंदनीकरण करून त्यानुसार अभिलेखे अद्ययावतीकरण करण्यात आले आहेत. नागरिकांना तक्रार नोंदवण्यासाठी तक्रारपेटी, महिलांसाठी विशाखापेटी व सूचनापेटीची सुविधा उपलब्ध करून देण्यात आलेली आहे. दर आठवड्याच्या सोमवारी सदरच्या पेटीतील प्राप्त तक्रारीच्या अनुषंगाने आवश्यक ती कारवाई अनुसरण्यात येणार आहे. सदरच्या सर्व सुविधा या आंतरराष्ट्रीय मानिकीकरण संघटने कडून ठरविण्यात आलेल्या मानकानुसार रचना करून तपासणी करण्यात आली. त्यानुसार उपविभागीय अधिकारी कार्यालय उदगीर व तहसील कार्यालय उदगीरला आंतरराष्ट्रीय मानिकीकरण संघटने कडून आय एस ओ प्रमाणपत्र प्रदान करण्यात आले आहे. याबाबत जिल्हाधिकारी श्रीमती वर्षा ठाकूर घुगे यांनी उपविभागीय अधिकारी सुशांत शिंदे यांना सदरचे आई एस ओ प्रमाणपत्र देऊन गौरविण्यात आले आहे. याप्रसंगी तहसीलदार राम बोरगावकर, नायब तहसीलदार डी के मोरे, नायब तहसीलदार राजश्री भोसले, पुरवठा निरीक्षक अधिकारी श्रीमती सुमित्रा इलमले तसेच इतर अधिकारी व कर्मचारी उपस्थित होते. जिल्हाधिकारी श्रीमती वर्षा ठाकूर घुगे यांनी सदरच्या केलेल्या कामकाजा बद्दल समाधान व्यक्त करून पुढील कार्यासाठी सर्व अधिकारी आणि कर्मचारी यांना शुभेच्छा दिलेले आहेत.
About The Author
