महाराष्ट्र उदयगिरी महाविद्यालयात कुत्र्याच्या चाव्यापासून बचावासाठी जनजागृती कार्यक्रम

उदगीर (प्रतिनिधी): महाराष्ट्र उदयगिरी महाविद्यालयात उदगीर नगर परिषद कार्यालयाच्या वतीने प्राणी जन्म नियंत्रण नियम 2023 अंतर्गत कुत्र्याच्या चाव्यापासून संरक्षण व रेबीज प्रतिबंधासाठी जनजागृती मोहीम राबविण्यात आली. या मोहिमेत कुत्रा रागात असल्याची चिन्हे ओळखण्याबाबत माहिती देण्यात आली. कान पूर्णपणे मागे जाणे, दात दाखवत गुरगुरणे, संपूर्ण शरीर पुढे झुकलेले असणे, नजर न रोखता पाहणे अशी लक्षणे आढळल्यास कुत्र्याजवळ न जाण्याचा सल्ला देण्यात आला. अनोळखी कुत्र्यांना हात लावू नये, अचानक हातवारे करण्याचे टाळावे, कुत्रा चिडलेला दिसल्यास त्याला चिथावू नये, तसेच देहबोलीकडे लक्ष द्यावे. अशा महत्त्वाच्या सूचना उपस्थितांना देण्यात आल्या. मार्गदर्शन करताना डॉ. आदित्य राठोड यांनी रेबीजमुक्त भारत 2030 या उद्दिष्टाची माहिती देत कुत्र्यांच्या चाव्यामुळे होणाऱ्या मृत्यूचे प्रमाण कमी करण्यासाठी जागरूकता गरजेची असल्याचे सांगितले. कुत्रा चावल्यावर तात्काळ कोणती काळजी घ्यावी, जखम स्वच्छ धुण्याचे महत्त्व आणि त्वरित लसीकरणाची प्रक्रिया याबाबत त्यांनी सविस्तर माहिती दिली. कार्यक्रमाचे प्रास्ताविक महेश चौधरी यांनी केले. उपप्राचार्य एस. जी. कोडचे, प्रा. एस. वी. मुडपे, प्रा. प्रवीण जाहूरे, प्रा. शिवहर फुलवळकर, शिवशंकर मटके, प्रफुल्ल आदावळे, सिद्धीकी मिसबा आदी मान्यवरांच्या उपस्थितीत कार्यक्रम पार पडला. सूत्रसंचालन व आभार प्रदर्शन प्रा. प्रसाद जालनापुरकर यांनी केले.