पोक्सो प्रकरणात मुख्य आरोपीला उच्च न्यायालयात जामीन मंजूर

उदगीर (एल पी उगिले) छत्रपती संभाजीनगर येथील खंडपीठाचे
न्या. सचिन देशमुख यांनी पोक्सो प्रकरणात मुख्य आरोपीला जामीन दिला आहे. प्रकरणाची थोडक्यात हकीकत अशी की, पीडिता यांनी दि. ०७/०४/२०२५ रोजी पोलीस स्टेशन उदगीर ग्रामीण येथे गुन्हा रजिस्टर क्र. १८३/२०२५ अन्वये कलम ३३३, ७४, ७५, ११५(२), ३५२, ३५१(२), ३(५) भारतीय न्याय संहिता २०२३ अंतर्गत तसेच पोक्सो कलम ८ व कलम १२ अंतर्गत आरोपी शिवलींग प्रभाकर चाळकापुरे व शकुंतला चाळकापुरे यांच्या विरोधात गुन्हा दाखल केला होता. सदर प्रकरणी तपासाअंती दोषारोप दाखल केल्यानंतर आरोपीने नियमित जामीन मिळण्यासाठी सत्र न्यायालय उदगीर येथे अर्ज दाखल केला असता सत्र न्यायालय उदगीर यांनी आरोपीचा जामीन अर्ज फेटाळला. सदर नाराजीने आरोपीने उच्च न्यायालयात जामीन मिळण्यासाठी अर्ज दाखल केला. सदर जामीन अर्जाच्या सुनावणीवेळी ॲड.अजिंक्य रेड्डी यांनी न्यायालयाच्या निदर्शनास आणून दिले की, पीडितेच्या आईने दि.१६/०३/२०२५ रोजी पोलीस स्टेशन उदगीर ग्रामीण येथे अदखलपात्र गुन्हा दाखल केलेला आहे. सदर अदखलपात्र गुन्ह्यामध्ये आरोपीने कोणत्याही प्रकारचा लैंगिक अत्याचार केल्याबद्दल उल्लेख सदर पीडितेच्या आईने केलेला नाही. तसेच प्रथम खबर अहवालाचे अवलोकन केले असता, प्रथम खबर अहवाल हे अंदाजे २१ दिवसाच्या विलंबानंतर दाखल केलेली आहे. सदर विलंबानंतर दाखल केलेल्या प्रथम खबर अहवाला मध्ये आरोपीवर खोटा आरोप केल्याची दाट शक्यता आहे. तसेच केवळ किरकोळ भांडणाला पोक्सो च्या गुन्ह्याचे स्वरूप देण्यात आल्याची शक्यता संपूर्ण कागदपत्रांचे व दोषारोपाचे अवलोकन केले असता नाकारता येत नाही. या आशयाचा युक्तिवाद उच्च न्यायालयासमोर मांडला. सदर युक्तिवाद ग्राह्य धरून न्या.सचिन देशमुख यांनी सदर आरोपीला नियमित जामीन मंजूर केला. सदर प्रकरणी ॲड. अजिंक्य रेड्डी यांनी काम पाहिले. त्यांना ॲड. विष्णू कंदे यांनी सहकार्य केले.