समता संदेश पदयात्रा परिवर्तन घडविणारी - डॉ.राजशेखर सोलापुरे

उदगीर (प्रतिनिधी) समाजमाध्यमांवर व्यस्त असणाऱ्या लोकांना समाजातील सामान्य माणसांसोबत जोडत समतेचा विचार पेरत महाराष्ट्र व कर्नाटक यांच्यात वैचारिक अनुबंध जोडणारी समता संदेश पदयात्रा माणसांचे आंतरिक परिवर्तन करत आधुनिक मूल्यांची समाजाला प्रेरणा देणारी आहे, असे प्रतिपादन लेखक व व्याख्याते डॉ.राजशेखर सोलापुरे यांनी केले.
कर्नाटकातील बसवकल्याण येथे समता संदेश पदयात्रेच्या तपपूर्ती (१२ वर्षे पूर्ण) निमित्ताने आयोजित कार्यक्रमात ते प्रमुख पाहुणे म्हणून बोलत होते. कार्यक्रमाच्या अध्यक्षस्थानी पदयात्रेचे प्रमुख ॲड. शिवानंदजी हैबतपुरे हे होते. तर प्रमुख पाहुणे म्हणून बसवकल्याण येथील मठाचे बसव देवरु, ॲड. बापुसाहेब मेटकरी, बसवराज कनजे, संजय पाटील, संतोष मलशेट्टी, हणमंत औरादे, भगवान चिवडे, नागेश जिवणे, यांची प्रमुख उपस्थिती होती.
ॲड. शिवानंद हैबतपुरे यांच्या नेतृत्वाखाली कुरुळा जि. नांदेड येथून शरण उरलिंग पेद्दी यांच्या जयंती निमित्त दिनांक २५ डिसेंबर २०२५ ला निघालेली पदयात्रा दिनांक १ जानेवारी २०२६ रोजी कर्नाटकातील बसवकल्याण येथे पोहोचली. हजारो लोक या पदयात्रेत दरवर्षी सहभागी होतात. महाराष्ट्र आणि कर्नाटक यांना जोडणाऱ्या या समता संदेश पदयात्रेला यावर्षी १२ वर्षे पूर्ण झाली. अखंडपणे समतेचा विचार रुजविणाऱ्या या पदयात्रेने समताधिष्ठित समाज उभारणीत मोलाचे योगदान दिले आहे.
पुढे बोलताना डॉ.सोलापुरे म्हणाले की, लोकोन्नती हीच आत्मोन्नती झाली पाहिजे, तरच समाजातील विचारांचा दुष्काळ नष्ट होऊ शकेल. महात्मा बसवेश्वरांनी कल्याण येथे स्थायी अनुभव मंटप उभा केला. त्या अनुभव मंटपाचे फिरते रुप म्हणजे समता संदेश पदयात्रा आहे. शिवानंद हैबतपुरे यांनी सलग बारा वर्षे ही पदयात्रा आयोजित करुन नव्या समाजाला आकार देण्याचे कार्य केले आहे, असे मत त्यांनी मांडले.
अध्यक्षीय भाषणात ॲड. शिवानंद हैबतपुरे यांनी पदयात्रेसाठी मदत करणाऱ्यांचे आभार मानत समता संदेश पदयात्रेला अधिक व्यापक करण्याचा निर्धार व्यक्त केला.
याप्रसंगी विविध बसवरत्न, बसवभूषण, बसवप्रबोधनकार या पुरस्कारांचे वितरणही करण्यात आले.
कार्यक्रमाचे प्रास्ताविक अनिता हैबतपुरे यांनी केले तर सूत्रसंचालन
निळकंठ पाटील ताकबीडकर यांनी केले. कार्यक्रमाच्या व पदयात्रेच्या यशस्वितेसाठी बसवेश्वर गुडपे, विक्रम पटणे, मनोज राघो, सचिन तांबोळकर यांच्यासह अनेकांनी प्रयत्न केले.