महाराष्ट्र उदयगिरी महाविद्यालयात संत तुकाराम पुरस्कार वितरण व मराठी भाषा संवर्धन पंधरवड्याचा समारोप

उदगीर (एल पी उगीले) येथील महाराष्ट्र उदयगिरी महाविद्यालयात संत तुकाराम पुरस्कार वितरण सोहळा तसेच मराठी भाषा संवर्धन पंधरवड्यानिमित्त आयोजित विविध स्पर्धांच्या बक्षीस वितरण व समारोप कार्यक्रमाचे आयोजन उत्साहात पार पडले. या कार्यक्रमाच्या अध्यक्षस्थानी महाराष्ट्र एज्युकेशन सोसायटीचे अध्यक्ष बसवराज पाटील नागराळकर हे होते. यावेळी संस्थेचे उपाध्यक्ष अ‍ॅड. प्रकाश तोंडारे, सचिव डॉ. रामप्रसाद लखोटिया, सहसचिव प्रशांत पेन्सलवार व कोषाध्यक्ष माधव नौबदे यांची प्रमुख उपस्थिती होती. महाविद्यालयाचे गुणवंत माजी विद्यार्थी तथा महात्मा फुले महाविद्यालय, अहमदपूरचे प्राचार्य डॉ. वसंत बिरादार यांना त्यांच्या उल्लेखनीय शैक्षणिक कार्याबद्दल संत तुकाराम पुरस्काराने गौरविण्यात आले. महाविद्यालयाचे प्राचार्य डॉ. आर. के. मस्के यांनी आपल्या प्रास्ताविकात संत तुकाराम पुरस्काराचा उद्देश स्पष्ट करताना, मराठी भाषा संवर्धन पंधरवड्या निमित्त आयोजित विविध स्पर्धांचे स्वरूप व त्यामागील शैक्षणिक व सांस्कृतिक उद्दिष्टे सविस्तरपणे विशद केली.
प्रमुख पाहुण्यांनी आपल्या मनोगतातून सामाजिक समतेचा पुरस्कार करणाऱ्या उदयगिरी महाविद्यालयाच्या वैभवशाली परंपरेचा गौरव केला. तसेच संत तुकारामांच्या विचारांची वर्तमान काळातील प्रासंगिकता अधोरेखित केली. या पुरस्कारामुळे कार्यगौरवाचे समाधान मिळाल्याची भावना त्यांनी व्यक्त केली असून, त्याचबरोबर समाजाप्रती आपली जबाबदारी अधिक वाढल्याचे मतही त्यांनी मांडले. डॉ. वसंत बिरादार यांनी त्यांना प्राप्त झालेला संत तुकाराम पुरस्कार व पुरस्काराची रोख रक्कम उदयगिरी महाविद्यालयातील दिव्यांग विद्यार्थ्यांप्रति समर्पित केल्याची घोषणा करून उपस्थितांची मने जिंकली. कार्यक्रमाचे अध्यक्ष बसवराज पाटील नागराळकर यांनी विविध स्पर्धांमध्ये यश संपादन करणाऱ्या विद्यार्थ्यांचे अभिनंदन केले. तसेच मराठी भाषेचे महत्त्व, वैभव व वैशिष्ट्य याविषयी मार्गदर्शन केले. कार्यक्रमाचे सूत्रसंचालन प्रा. शिवहार स्वामी फुलवळकर यांनी केले, तर प्रा. डॉ. कोंडिबा भदाडे यांनी उपस्थितांचे आभार मानले. या कार्यक्रमास प्रा. डॉ. अनिल मुंडे, प्रा. डॉ. मारोती कसाब, प्रशांत डोंगळीकर तसेच महाविद्यालयातील प्राध्यापकवृंद व विद्यार्थी मोठ्या संख्येने उपस्थित होते.