लातूर (एल पी उगीले) यावर्षी जिल्ह्यात पावसाचे प्रमाण कमी झाल्यामुळे संभाव्य पाणीटंचाईचा सामना करण्यासाठी जिल्हा प्रशासनाकडून विविध उपाययोजना करण्यात येत आहेत. भविष्यातील पाण्याचे नियोजन, नागरिकांना पिण्यासाठी पाणी उपलब्ध करून देणे तसेच जनावरांच्या पिण्याच्या पाण्याची गरज लक्षात घेऊन पाण्याचा काटकसरीने वापर करणे आवश्यक आहे. या पार्श्वभूमीवर शेतीसाठी वापरण्यात येणाऱ्या विद्युत मोटारींच्या वीजजोडण्या खंडित करण्यात येत असून, काही ठिकाणी डीपीवरील विद्युत पुरवठाही बंद करण्यात येत आहे. त्यामुळे अशा शेतांमध्ये मोटारी, विद्युत वायर आणि इतर साहित्य बराच काळ वापराविना पडून राहण्याची शक्यता आहे. या परिस्थितीचा फायदा घेऊन चोरीच्या घटना घडू नयेत आणि शेतकऱ्यांचे आर्थिक नुकसान टाळता यावे, यासाठी लातूर जिल्हा पोलीस दलाने शेतकऱ्यांना सतर्क राहण्याचे आवाहन केले आहे.
शेतीतील साहित्याच्या सुरक्षेकडे दुर्लक्ष करू नका
पाणीटंचाईमुळे ज्या शेतांमधील विद्युत मोटारींच्या जोडण्या खंडित करण्यात आल्या आहेत, त्या ठिकाणी मोटारी, केबल, विद्युत वायर तसेच शेतीसाठी वापरण्यात येणारे इतर साहित्य सध्या वापरात नसू शकते. त्यामुळे हे साहित्य शेतात किंवा उघड्यावर तसेच पडून राहिल्यास चोरी होण्याची शक्यता नाकारता येत नाही. शेतकऱ्यांनी आपल्या कष्टाच्या पैशातून खरेदी केलेल्या या साहित्याचे नुकसान झाल्यास त्यांना आर्थिक फटका बसू शकतो.
ही बाब लक्षात घेऊन शेतकऱ्यांनी सध्या वापरात नसलेल्या मोटारी, वायर, केबल आणि इतर मौल्यवान साहित्य शक्यतो सुरक्षित ठिकाणी हलवून ठेवावे. साहित्य शेतात ठेवणे अपरिहार्य असल्यास त्याची योग्य सुरक्षा करावी. शेतातील साहित्याची वेळोवेळी पाहणी करावी तसेच शेजारील शेतकरी आणि परिसरातील नागरिकांशी समन्वय ठेवून संशयास्पद हालचालींकडे लक्ष द्यावे.
संशयास्पद हालचाली आढळल्यास पोलिसांना माहिती द्या
शेतातील मोटारी, वायर किंवा अन्य साहित्य चोरीला जाऊ नये, यासाठी प्रत्येक शेतकऱ्याने खबरदारी घेणे गरजेचे आहे. शेताच्या परिसरात अनोळखी व्यक्तींची संशयास्पद हालचाल आढळल्यास किंवा चोरीचा संशय निर्माण झाल्यास तातडीने जवळच्या पोलीस ठाण्याशी संपर्क साधून माहिती द्यावी. चोरीची घटना घडल्याचे निदर्शनास आल्यास विलंब न करता पोलिसांना कळवावे.
पाणीटंचाईच्या काळात सतर्कता आणि सहकार्य आवश्यक
सध्या कमी पावसामुळे निर्माण झालेल्या परिस्थितीला सामोरे जाताना पाण्याचे नियोजन जितके महत्त्वाचे आहे, तितकेच शेतकऱ्यांच्या मालमत्तेचे संरक्षण करणेही आवश्यक आहे. पाणीटंचाईमुळे शेतीतील विद्युत मोटारींचा वापर कमी किंवा बंद असताना त्यांची सुरक्षा करण्याकडे दुर्लक्ष करू नये. योग्य वेळी घेतलेली खबरदारी चोरीच्या घटना रोखण्यास आणि शेतकऱ्यांचे संभाव्य नुकसान टाळण्यास मदत करू शकते.
लातूर जिल्हा पोलीस दलाच्या वतीने सर्व शेतकरी बांधवांना नम्र आवाहन करण्यात येते की, पाणीटंचाईच्या सद्यस्थितीत शेतीसाठी वापरण्यात येणाऱ्या मोटारी, विद्युत वायर, केबल आणि इतर साहित्य सुरक्षित ठिकाणी ठेवून त्यांची काळजी घ्यावी. या आवाहनाकडे गांभीर्याने लक्ष देऊन पोलिसांना सहकार्य करावे आणि आपले आर्थिक नुकसान टाळण्यासाठी आवश्यक ती खबरदारी घ्यावी.
Responses (0 )