‘
लातूर (एल पी उगीले) जिल्हा पोलीस अधीक्षक अमोल तांबे यांच्या संकल्पनेतून पोलीस आपल्या गावामध्ये ही मोहीम राबवून पाणीटंचाईच्या पार्श्वभूमीवर संभाव्य सामाजिक समस्यांना प्रतिबंध करण्यासाठी पोलीस आणि नागरिकांची संयुक्त रणनीती; ग्राम सुरक्षा दलाच्या स्थापनेवर भर देण्यात येत आहे.
कमी पावसामुळे निर्माण होणाऱ्या संभाव्य समस्या आणि त्यातून उद्भवणाऱ्या सामाजिक आव्हानांना सामोरे जाण्यासाठी लातूर जिल्हा पोलीस दलाच्या वतीने १ ऑक्टोबरपासून ‘पोलीस आपल्या गावामध्ये’ हा विशेष उपक्रम राबविण्यात येत आहे. या उपक्रमांतर्गत जिल्ह्यातील विविध पोलीस ठाण्यांच्या हद्दीतील गावांना आतापर्यंत १०२ भेटी देऊन ५,४९२ नागरिकांशी संवाद साधण्यात आला आहे. या संवादातून ग्रामीण भागातील समस्या समजून घेऊन त्यावर प्रतिबंधात्मक उपाययोजना आखण्याचा प्रयत्न लातूर पोलीस दल करीत आहे.
पाणीटंचाईच्या संकटावर मात करण्यासाठी सामूहिक प्रयत्न
पावसाचे प्रमाण कमी असल्यामुळे आगामी काळात पाणीटंचाई, रोजगाराच्या संधींचा अभाव, आर्थिक अडचणी, स्थलांतर आणि त्यातून उद्भवणाऱ्या विविध सामाजिक समस्यांना सामोरे जावे लागू शकते. या पार्श्वभूमीवर केवळ कायदा व सुव्यवस्था राखण्यापुरती भूमिका मर्यादित न ठेवता, संभाव्य समस्यांची वेळीच ओळख करून त्यावर नागरिकांच्या सहभागातून उपाय शोधण्याचा प्रयत्न या उपक्रमाद्वारे करण्यात येत आहे.
गावभेटीदरम्यान पोलीस अधिकारी आणि कर्मचारी ग्रामस्थांशी थेट संवाद साधून त्यांच्या अडचणी, स्थानिक परिस्थिती आणि भविष्यात उद्भवू शकणाऱ्या समस्यांची माहिती घेत आहेत. त्याचबरोबर या समस्यांना प्रतिबंध करण्यासाठी कोणत्या उपाययोजना करता येतील, यावरही चर्चा केली जात आहे.
गावातील तरुणांच्या सहभागातून ग्राम सुरक्षा दल
या उपक्रमाचे महत्त्वाचे वैशिष्ट्य म्हणजे गावातील होतकरू, सुशिक्षित आणि समाजाभिमुख तरुणांचा सहभाग घेऊन ‘ग्राम सुरक्षा दल’ स्थापन करण्यावर भर देण्यात येत आहे. गावातील सामाजिक सलोखा टिकविणे, स्थानिक समस्यांची माहिती वेळेत मिळविणे, गरजू नागरिकांना मदत करणे आणि संभाव्य वाद किंवा अनुचित घटनांना प्रतिबंध करण्यासाठी ग्रामस्थ व पोलिसांमध्ये समन्वय वाढविणे, यासाठी अशा सहभागाचा उपयोग होऊ शकतो.
गावातील विविध समाजघटकांतील जबाबदार तरुणांना सोबत घेऊन स्थानिक परिस्थितीनुसार प्रतिबंधात्मक उपाययोजनांचे नियोजन करण्याचा प्रयत्न करण्यात येत आहे. त्यामुळे गावातील प्रश्न गावकऱ्यांच्या सहभागातून समजून घेऊन त्यावर सामूहिकरीत्या मार्ग काढण्यास मदत होणार आहे.
पाण्याचे नियोजन आणि आर्थिक संकटाचा सामना करण्याबाबत मार्गदर्शन
पाणी हे मौल्यवान साधन असून उपलब्ध पाण्याचा काटकसरीने वापर, पाण्याचे योग्य नियोजन आणि पाणी बचतीचे महत्त्व याबाबतही ग्रामस्थांशी चर्चा करण्यात येत आहे. कमी पावसामुळे निर्माण झालेल्या अडचणींवर मात करण्यासाठी गावपातळीवर कोणते प्रयत्न करता येतील, याबाबत नागरिकांच्या सूचनाही जाणून घेतल्या जात आहेत.
याशिवाय आर्थिक संकट किंवा प्रतिकूल परिस्थिती निर्माण झाल्यास नागरिकांनी खचून न जाता धैर्याने परिस्थितीचा सामना करावा, यासाठी संवाद साधण्यात येत आहे. सध्याची पाणीटंचाई आणि त्यातून निर्माण होणाऱ्या अडचणी या कायमस्वरूपी नसून, नियोजन, परस्पर सहकार्य आणि संयमाच्या माध्यमातून त्यावर मात करण्यासाठी प्रयत्न करता येतात, हा सकारात्मक दृष्टिकोन नागरिकांपर्यंत पोहोचविण्याचा प्रयत्न केला जात आहे.
नागरिकांच्या सहभागातून समस्यांवर नवे मार्ग
‘पोलीस आपल्या गावामध्ये’ या उपक्रमाला ग्रामस्थांकडून सकारात्मक प्रतिसाद मिळत आहे. नागरिक पोलिसांशी विविध विषयांवर मोकळेपणाने संवाद साधत असून, स्थानिक समस्यांबाबत आपल्या सूचना आणि कल्पना मांडत आहेत. या चर्चेतून प्रतिबंधात्मक उपाययोजनांसाठी नवे पर्याय समोर येत आहेत.
नागरिकांकडून प्राप्त होणाऱ्या सूचना आणि स्थानिक परिस्थितीतून समोर येणाऱ्या बाबींचे एकत्रीकरण करून संभाव्य सामाजिक समस्यांचा प्रभावीपणे सामना करण्यासाठी नियोजन करण्यात येत आहे. पोलीस आणि नागरिक यांच्यातील विश्वासाचे नाते अधिक दृढ करून गावपातळीवर सुरक्षित, जागरूक आणि सहकार्याची भावना असलेले वातावरण निर्माण करणे, हा या उपक्रमाचा प्रमुख उद्देश आहे.
१०२ गावभेटी आणि ५,४९२ नागरिकांशी साधलेला संवाद हा केवळ आकडा नसून, ग्रामीण भागातील प्रश्न समजून घेण्यासाठी आणि त्यावर सामूहिक उपाय शोधण्यासाठी सुरू असलेल्या प्रयत्नांचा महत्त्वपूर्ण टप्पा आहे. नागरिकांचा सक्रिय सहभाग, स्थानिक पातळीवरील नियोजन आणि पोलिसांचा समन्वय यांच्या माध्यमातून संभाव्य संकटांचा प्रभाव कमी करण्यासाठी लातूर जिल्हा पोलीस दल प्रयत्नशील आहे.
Responses (0 )